حاسبوا أنفسكم قبل أن تحاسبوا!

من وقت للتاني كل واحد فينا محتاج يقعد مع نفسه جلسه محاسبة ذاتيه بمثابة عملية تهذيب للنفس ودي عملية مينفعش تقف أبداً.. يكون ده على أيد رجل دين، طبيب نفسي، كوتش، معالج.. حد أكبر منك مشي السكة قبلك أو حتي نفسك أو أياً كانت الطريقة أو الوسيلة أو المسلك تجاه ده المهم أنك طول ما أنت عايش فى هذا القدر من الفتن فتهذيب النفس من وقت للتاني شيء كالماء والهواء.. عملية مبتنتهيش لأن فيه مشاعر لو سيبتها جواك هتكون بمثابة تدمير ذاتي ليك ثم هتمحي من جواك دور الفاعل وهتعيشك العمر كله فى دور المفعول به..

هديلك مثال واحد وتقدر تقيس عليه:

فلان شاف حد أحسن منه.. يكون احسن بقي مادياً، علمياً، أو أياً كان فحس بشيء فى صدره.. مع الوقت لاحظ أن ده بيتكرر... يبقي محتاج هنا يقف ويفهم ويدور هو ليه أنا زعلت للدرجة دي لما شفت فلان بالشكل ده؟

لأن هو كدا عملك Invitation ل Topic جواك تشوبه شائبه ما!!

وقتها الشخص بيحتاج يقف مع نفسه ويسأل:

هل عندي مشكلة مع الناس الأنجح والأفضل مني عموماً؟

هل مبعرفش أتمني من جوايا الخير لحد فعلاً؟

طب هل كنت أتمني أكون فى مكانه مثلاً؟

هل كنت أتمني أكون معاه وقت النجاح ده ونتشارك ده سوا؟

واللا أنا شايف أني أحق منه بده؟

شوية أسأله محترمه لازم تتسأل هنا.. ليه لازم تتسأل الأسئلة دي؟

علشان خاطر أن الموضوع ده لو أتكرر فمش هيقف هنا وبس.. مخك مش هيسيبك.. وهينقلك لمستويات أخري من الكُره تجاه نفس الأشخاص.. زي تمني زوال النعمه اللي هيا ربنا عاطيهالهم اللي هو موزع الارزاق سبحانه فربما يصل بالفرد ده الحال أنه يسيب دوره كبشري ويتدخل فى اختصاصات الملك هو ليه يارب عاطيه أحسن مني؟ ليه فلانه الأوحش مني أتجوزت وأنا لأ؟ ليه فلان متعبش فى أي شيء فى حياته ولقي كل شيء جاهز وأنا لأ؟ ليه فلانه مشهوره اكتر مني وأنا لا؟ ليه دي خلفت وانا لأ وليه دي اشتغلت شغلانه بتحبها وانا لأ ومليوووووون ليه! وتخيل بقي!!! نوع ال ليه ده أسهل طريق لتشكيكك كمسلم فى أن الله عدل!

المؤسف يا صديق أن وقتها أنت بتكون مفكر ان الشيطان هو اللي بيوصلك للحظة دي.. بس للأسف.. اللي بيوصلك للحظة دي مش الشيطان! اللي بيوصلك للحظة دي حاجه من أتنين:

سوء فكرك.

شيطان أنس حواليك.. وده أخطر من ابليس نفسه عليك.. وتخيل بقي ده فى رمضان ولا كأن فيه حديث (مَن لم يَدَعْ قول الزُّور والعملَ به والجهلَ، فليس للهِ حاجةٌ أن يَدَعَ طعامه وشرابه)

((قول الزور)): الكذب وقول الباطل.

((والعمل به)): يعني العمل بالباطل.

((والجهل)): السَّفَه، سواء أكان سفهًا على النفس أو على الآخرين، ويدخل في الجهل جميع المعاصي وأولهم الغيبه والنميمه!!

حاسبوا أنفسكم قبل أن تحاسبوا.. وزنوا أعمالكم قبل أن توزن عليكم.

#شهر_محاسبة_وتهذيب_النفس

الحمدلله

Post Original Date:  April 13,2021
FB Post's Link: https://www.facebook.com/daghash.eslam/posts/10219781160939923 
Photo Source: https://pixabay.com/