أول عقد زواج فى التاريخ حسب ما تم ذكره فى الأبحاث كان من حوالي ٢٥٠٠ سنة.. وكان زواج لبنت عمرها ١٤ سنة فى مقابل مادي تبادلي ب ٦ بقرات.. وكان فى مصر!
لما جه الدين الإسلامي.. وبدء يضع الموازين الصحيحة بدلاً من أن تباع المرأة زي ما حصل كدا من ٢٥٠٠ سنة.. قسم المهر لشقين:
- مادي.
- معنوي.
والأحاديث والمواضع كتير هنا للي حابب يتطلع عليها.. واللي اتذكر فى الدين منها كان خاتم من حديد (مادي) وفى موضع أم سلمه حينما تقدم إليها أبو طلحه وكان مهرها أن يدخل الإسلام (معنوي).
وقصة أخرين حديقة فى موضع أنه يطلقها وترد عليه حديقته (وده واحد من أسباب كتير ادت أنه عرفاً اللي كاره هو اللي بيسيب كل حاجه وده قانون سائر حتى الأن فى مجتمعات كتير).. أو أية من القرأن (معنوي)... وهكذا.
إذاً هو مادي ومعنوي.. فوارد يكون المهر معنوي ووالله أصعب ١٠٠ مرة من المادي! كأنها تطلب مهرها إجازة وحفظ القراءن أو أجزاء منه.. أو أو.
هذا فيما يخص المعنوي.
أما فيما يخص المادي فبرضوا الدين لم يذكر حد أدني ولا أقصي!!
لو ان رجلاً أعطي امرأة صداقاً ملء يديه طعاماً، كانت له حلالاً.. حديث الرسول صلى الله عليه وسلم.
تخيل ممكن المهر يكون أية!!
ولما الرسول فى أحدي الغزوات لقي نقاش بروح متدنيه فى جنوده على موضوع الزواج رخص لهم أن تنكح المرأة بالثوب.. ثم قرأ عليهم
يا أيها الذين آمنوا لا تحرموا طيبات ما أحل الله لكم ولا تعتدوا أن الله لا يحب المعتدين.
طيب.. لو دينار واحد مهرها حتي يتدفع أزاي يا دين؟
برضوا الدين سابها مفتوحه.. لدرجة أنه يُدفع معجلاً أو مؤجلاً!
تعالي نشوف دين اليسر ليه حصل فيه كدا.
علشان أحمد.. من الفلاحين.. والده عنده بيت والعادات هناك أن كل ابن يتبني ليه شقه فهيتبني ليه شقه، وهتتشطب، وهيقعد فى بيت العائلة.. وفى جوازه لا ابوة هيسيبه ولا اخواته.. وواقف فى ضهره جيش لو احتاج ١٠٠ ألف لو وطي على كل واحد من عائلة والده ووالدته أقسم يجمعهم.. حتي لو هيطلع مديون ويسددهم على سنين.. بس دينه فى اهله منهم فيهم يعني من الأخر حتي وهو عريان مستور وده ينطبق على غالبية الفلاحين، العرب، الصعايدة.
محمود اللي عايش فى القاهرة.. اللي لسه بيفكر يشتري شقة! ويجيب عفش!! وشبكة وهكذا.. واللي غالباً غالباً غالباً هيكون واقف لوحده ومفيش فى ضهره حد.
فلما نشوف أمبارح يطلع علينا فئة مجروحة من موضوع القائمة وحظهم الغير جيد اللي وقعهم فى أشباه رجال.. وفئة انفلونسرز حبوا يركبوا التريند.. وفئة من أجل رحلة البحث عن like يقولوا قيمتك تعلى كل ما تغلي طلباتك.. وفئة يفكروا يسعروا سعر مهر البنت حسب امكانياتها جمالياً أولاً.. ثم فئة أخري تقولك الدين ظلم المرأة! فدول نسوا أن الدين دائماً ما يحط على اليسر وأن كل شيء فيه وخاصةً الماديات تتناسب مع أمكانيات ودخل الفرد.
فمثلاً أنا شخصياً ليا صديق وارث عن والده ما يقرب والله من ١٠٠ فدان.. فده لما يجي يقدم مهر لو قدم مهر ١٠٠ ألف جنية كأنه بيقبض ٦٠٠٠٠ جنية وجاب منهم حاجه ب ٦ جنية.. حرفياً بالظبط بل وأقل.
فمنجيش مثلاً على ظابط حديث تخرج محدوف فى سيناء ليدافع عن الوطن فى مقابل ٦٠٠٠ آلاف جنية ونطلب منه مهر وعفش وشبكة ب ٦٠٠ ألف! لأ وكمان ندخله فى دوامه الست فى الدين يتجابلها خدامه!
صدق عمر بن الخطاب أعدل حاكم فى تاريخ الإسلام حينما قال:
"ألا لا تغالوا فى صداق النساء، فإنها لو كانت مكرمة فى الدنيا، أو تقوي عند الله، كان أولاكم بها رسول الله.. ما أصدق امرأة من نسائه، ولا أصدقت امرأة من بناته فوق اثني عشرة أوقية، ألا وإن أحدكم ليغالي بصداق امرأته، حتى يبقي لها فى نفسه عداوة"
فده بس.. كان ردي على جملة الدين ظلم المرأة! وبرغم أني مبحبش اتكلم فيه لأنه غير تخصصي فلما أتربط بشي من تخصصي حبيت أجيبلكم من أول حاله فى التاريخ تم تسجيلها ثم الإسلام.. وكمان ليه كتبت فوق ان العقد تم فى مقابل مادي تبادلي ده علشان البحث قال نصاً:
And records a 14-year-old girl in Egypt being traded as a bride in Exchange for six cows!
وأخيراً.. كنت أتمني أجيب أبحاث وأرقام مصر توريكم الكارثة اللي داخلين عليها فى العلاقات بسبب اللي عملاه السوشيال ميديا من أن كل واحد ينشر السلبي بس فى تجاربه وجوازه.. وكنت حابب اشارك معاكم بحث من ارضنا وارقمنا تخطي ١٠٠ صفحة وللأسف والله برضوا نصاً.. كان من أسباب العزوف عن الزواج وتأخره من أعلى أسبابه(النظره للماديات فى أمر الزواج) من الطرفين.. بس للأسف البحث غير مسموح نشره.. بس اللي اقدر اشاركه أن مصر هتفوق قريب وتتصدي لمشكلة كثرة حالات الطلاق وتابعياته.. ووقتها اللي بيتاجروا بالمرأة وقضاياها مش هيعرفوا ياكلوا عيش عليهم للأسف!
فلو عندك كلمة حلوة شاركها.. ولو عندك خير قوله.. ولو عايز تتكلم فى أمر العلاقات علمني حاجه تفيدني وتبنيني بدل ما تهدني وتخليني متحفز لحالة الحرب اللي هدخلها فى أول علاقة..
ولو معرفتش تبني.. يبقي متهدش.
ونقفل بقي الكلام عن أن الاسلام ظلم المرأة علشان والله ما ظلمها الإسلام قط وما ظلمها إلا من يحارب جاهداً ليلاً ونهاراً إثبات أنها ظُلمت!
