وقت الخلاف!

 عقلي مش قادر يستوعب ولا يتقبل فكرة أن يكون فية زوج يلفق كلام أو قضية أو أتهام لزوجته وقت الأنفصال بٌهتاناً وكذباً وزوراً علشان صراع مين اللي يطلع بمكسب مادي أكتر!

عقلي مش قادر يستوعب ولا يتقبل فكرة أن يكون فية زوجة تقف قدام القاضي تسمعه كلمتين سمعهم ليها محامي غير شريف وغير مٌحترم علشان تاخد خٌلع والله ما أنسي فى جلسة عميله بتقولي أنها خايفة تضعف من كتر ضغط المحامي بتاعها عليها تقول كلمتين أنه فيما معناه أحنا عايشين مع بعض زي الأخوات وأنا خايفة على نفسي من الفتنة فعايزة أخلع نفسي وأتجوز تاني.

عقلي مش قادر يستوعب ولا يتقبل فكرة أن يكون فية صديق يخرج من صداقة فيخرج كل سر صاحبه أأتمنه عليه لأي سبب كان!!!

طب يا جماعة مفيش حاجة أسمها عيش وملح؟ طيب مفيش ذكري لموقف جدعنه حصل؟ طيب مفيش أنك حتى أنت يا سيدي اللي تتفضل مشكوراً وتعلو عن الصغائر؟

طيب مفيش أية فى القرأن عدت عليكم بتقول ولا تنسوا الفضل بينكم؟ طيب مفيش أية بتقول إمساك بمعروف أو تسريح بإحسان؟ واللا ده قرأن تاني واللا أحنا بناخد منه اللي عايزينه وسايبين الباقي واللا أحنا أية اللي جرالنا بجد!!

أية القرف والعك والفجر فى الخصومه اللي الواحد بيسمعه فى الجلسات ده!! والله العظيم الواحد ما كان يتخيل عمره أن يجي عليه اليوم اللي يسمع فيه ده ويشوف عائلات بحالها قاعدة تخطط وتدبر وتكيد علشان ملاليم! ده الواحد لو دخل خلاف وفيه شيء مادي بيقول للشخص الأخر شوف ليك أية ولو طلب الأكتر بيديهوله ويقول نطلع ليوم القيامة لينا أحسن ما نطلع علينا!

ونصيحة بقي لوجه الله!

وقت الخلاف... أول ما تلاقي نفسك أتمليت حقد وغل وكره وغضب جواك تجاه الشخص... حاول تقف وتسأل نفسك... هو كل الشيله دي من حقد وغل وكره وغضب بتاعة الشخص اللي قدامي ده بس؟ واللا دي من مواقف وأحداث وأيام وسنين وأشخاص بل وخذلان من نفسي! لأنه صدقني غالباً وفى معظم الحالات عمر الغضب ده كامل ما هيكون بتاع الشخص!

يعني اللي راح لبيت أهلها يقولهم أصل بنتكم مش بنت زي البنات لا جسم ولا شكل ولا أكل ولا شرب ولا سرير نافعة فيه بزعيق وشخط وتمنع عن طلاق لسنين كل الغضب ده بتاعها لوحدها؟ كل الشيلة دي بتاعتها لوحدها؟

لعنة الله على السوشيال ميديا اللي ملت كل جنس كره وبغض وغضب تجاه الجنس الأخر.

لعنة الله على كل شيطان أنس ساعد فى أن الناس دي توصل لكدا!

لا حول ولا قوة الا بالله!

Post Original Date:  March 8, 2021
FB Post's Link: https://www.facebook.com/daghash.eslam/posts/10219530294748425 Photo Source: https://pixabay.com/