وأفسدت الناصحة من حيث أرادت الأصلاح!

 من كام يوم كنت راكب فى المواصلات... فجأة بنت جنبي جالها تليفون من أخت جوزها فردت عليها "حبيبتي أزيك.. طلقني!!! طلقني غيابي!!! لا يا حبيبتي مش زعلانه.. أنا بس مش قادره أصدق.. قدر الله وما شاء فعل.. بس أنا ليا عندك طلب واحد.. ممكن تسأليهولي أنا قصرت معاه فى أيه؟ بالله عليكي أساليه خلي الواحد يتعلم من أخطاءه بس.. لا يا بنتي أنتم أهلي والله أنا مشفتش منكم حاجه وحشه وعمري ما بعرف أخد حد بذنب حد." إلى أخر المكالمة.

شوية وجالها تليفون تاني مامتها مستحملتش الخبر وتبعت ونقلوها المستشفى.. والبنت بترد على التليفون بكامل الثبات المصطنع.

كان هاين عليها أقولها طيب استني لما تروحي اعملي المكالمات دي مش فى المواصلات كدا لأني عارف الثبات المصطنع ده مش هيدوم كتير وأن دمعتها المكتومه يمكن متتحسش من اللي ممرش بنفس التجربة دي بس لو بنت مرت بنفس التجربة بالظبط (أقصد أنها فيوم وليله تصحي تلاقيها اتطلقت غيابي من حد كانت بتحبه أو حياته مستقره معاه) ببقي عارف ان اللي مرت بالتجربة دي أو المختص هما بس اللي هيشوفوا الدمعات والصرخات المكتومه دي ويسمعوا صداها كأوجاع وصراغات أعلى من أعلى صوت أسمع القاصي والداني.

وفجأة.. جه فى دماغي عشرات الحالات اللي مرت عليا بعد الطلاق.. ومليون سؤال:

هتجوز تاني واللا لأ.

مين هيشلني بعيالي طيب بعد سنهم ده؟

يعني انا كدا حياتي خلاص خلصت عليا وحيده أنا وعيالي كدا.

و و و.

وأفتكرت تبعيات الطلاق اللي كانت بتطول حتى الراجل اللي عايز يتجوز مطلقه من أهله ودي لوحدها متتحكيش.

أنا بكره الطلاق.. بكرهه بكل من تحمله الكلمة من معني ومن كل قلبي.. وصدقاً هو كما قاله المولي أبغض الحلال.. وأنا والله أبغضه بغضاً شديداً..... قاتله الله!

تبعيات الطلاق مش سهله.. ومجتمعنا لسه مش مؤهل شويتين تلاته للتعامل مع موضوع وملف زي الطلاق.

وفى كل دول العالم الطلاق بيتم التصدي ليه نظراً لتبعياته النفسية والأجتماعية و و و.. ويمكن كانت خطوة ممتازة لما الرئاسة هنا تبنت مؤخراً ملف زي ملف الشيء الملعون اللي اسمه طلاق.

الطلاق مش سهل.. والله العظيم ما سهل.. أنا كرجل لو بحب حد عندي موته أهون من أنفصالي عنه.. اه حتي لو أستحال العشره بينا.. هننفصل.. بس هيتبقي ذكريات وعيش وملح وحلو ووحش وفرح وحزن وأيام وسنين وليالي وسهر وقرب وبعد ولحظات تفهم وعكسها ومليون ذكري أنا شخصياً هيكون بيمشي وهو بياخد معاه جزء من روحي معاه والله!

بكتب الكلمتين دول وبكل حرقه بعد ما لقيت حد مدخلني جروب حل مشاكل ولقيت فى بوست واحد واحده بتسأل عن حل لمشكلتها لقيت أكتر من ١٠٠ بنت تعليقاتهم أتطلقي!

كلمة اتطلقي فى وقت فيه الست منفعله لأي سبب وارد تخليها تاخد الخطوة فعلاً.

بس يا تري ده وقت مناسب؟

أنا موضوع الطلاق أو الأنفصال من علاقة زي خطوبة مثلاً بياخد مني من ٤ ل ٥ جلسات!!! والجلسه قبل الأخيرة هيا اللي بناخد فيها القرار والأخيرة هيا ما بعد القرار.. يعني العميل لو هياخد ٥ جلسات فده معناه انه لحد الجلسة ال ٣ مطلعش بقراره.. ولو مشي من غير ما يكمل فهو معملش حاجه ومطلعش بحاجه.. وفى بعض الحالات زي مشاكل بين عائلاتين لا الزوج ولا الزوجة ليهم ذنب فيها ممكن الجلسات تكون أطول من كدا نظراً لتعقيد الموضوع وكثرة اطراف نزاعه.

يجي حد يقول فى كلمة كدا أتطلقي؟

ياخي أقسم بالله العظيم أنها ما خرجت مني فى جلسة فى مئات جلسات ال Relationship Coaching!! ما لكم كيف تحكمون!!

ده انت لو مغسل وضامن جنه ومكشوف عنك الحجاب مش هتعرف من كلمتين سمعتهم الطلاق أو الأنفصال أنفع أو أضر ليها!!

أيوه الطلاق أحياناً حل.. وأه أحياناً بيكون الحل رقم ١.. بس ده فى نسبه لا تتعدي ١ فى كل ١٠٠٠ حاله طلاق.. زي أنه يكون مدمن مش عايز يتعالج واتحاول معاه مره واتنين.. وهكذا وفيما عدا ذلك.. عمري ما شفت الطلاق قرار أول زي الناس اللي ماشيه توزعه على كل مشكلة يبقي حلها الأول "يا حبيبتي أتطلقي"

وأه بالمناسبة.. فيه حديث بيقول "ليس منا من يخبب إمرأة على زوجها أو عبداً على سيده" وبعض التفسيرات اللي قرأتها قالت أن ده من كبائر كبائر الذنوب لدرجة أن لو اللي بيعمل ده راجل فالمالكية شافوا أن الست اللي خلاها تسيب جوزها دي لا تحل له كزوجه.. ولو اللي بتعمل ده سيده وخببت زوجه على زوجها فلها عذاب عظيم لدرجة بعض التفسيرات أشارت هنا أنها ليست من أفعال المسلمين أشارات ل "ليست منا" اللي الرسول أشار أليها وأن الدين الإسلامي بل والرسول نفسه بريء من الكبيره اللي ارتكبتها دي بعدما قال هذا الحديث.. تقف بقي قدام ربنا وتحضر رد لجريمتها دي.

النصائح الملعونه اللي زي ده واللي بالشكل ده ينطبق عليها جملة واحده فقط... فقط.. فقط..

وأفسدت الناصحة من حيث أرادت الأصلاح!

Post Original Date:  May 8, 2021
FB Post's Link: https://www.facebook.com/daghash.eslam/posts/10219946217826242 Photo Source: https://pixabay.com/