Soulmates Are Not Perfect!

 جون جراي بيحكي عن عميل كان بيروح ليه جلسات لفترة طويلة... بيقول ان العميل ده دخل فى مئات العلاقات مع نساء على مدار حياتة.. ولحد سن ٤٧ سنه ومقدرش ياخد ولا مرة خطوة للزواج بواحده منهم.. فى حين أنه فعلاً فعلاً عايز يتجوز!! لحد ما فى جلسة حكاله أنه حتي لما لاقي البنت اللي حبته وحبها مقدرش ياخد معاها خطوة!!! والبنت اللي بعدها برضوا مقدرش ياخد خطوة!!! طب وبعدين؟

جون جراي أرجع ده لعدده أسباب ومنهم:

- المقارنة: بيقول ان الشخص ده أصبح قادر أنه يقعد فى ساعات طويلة يقارن كل بنت بالتانية! دي عندها روح.. ودي ضحكتها حلوة ودي كذا ودي كذا.

- وزي ما قالها نصاً جراي:

he was expecting one woman to have it all

حرفياً كان بيدور عليهم فيها!!! عايز واحده بقي عندها كل ده.. ودي للأسف أغلي ضريبة بيدفعها متعدد العلاقات (بنت أو شاب) أنه مبقاش فيه حد بيملي عينه والشخص زير النساء دي مش ميزة ده شيء لعنه عليه لأنه كل ما قابل وكل ما فهم فى الستات أكتر أستني وتوقع من اللي جاية أعلي وأعلي وأعلي.

طيب والحل بقي؟

طبعاً مفيش حاجة فى العلاقات أسمها حل عام كدا.. وكل حالة لها أفضل حل يناسبها هيا فقط فقط فقط. ولكن فى الحالة دي اللي حصل مع شخص زي ده هو الأتي:

- أول وأهم حل أنه يعرف أن مش كل حد هنحبه هينفع نتجوزه وإلأ فيه علاقات هنفضل ندفع ضريبتها طول عمرنا! (جون جراي صوته اتنبح فى الحته دي )

- الحاجه التانية أن العلاقة تاخد وقتها وتمر بمراحلها الطبيعية.. زي ما مفيش شاب بقي شاب قبل ما يبقي مراهق وطفل.. كذلك فى العلاقات.. الحالة دي كان الراجل بيدخل العلاقة وينط من مرحلة الأعجاب للمرحلة الرابعة من ضمن ٥ مراحل قبل قرار الزواج والمرحلة الرابعة هي ال Intimacy فى حين أنه مأخدش أي وقت فى مرحلة ال Uncertainty (مرحله أنا لسه مش متأكد هيا واللا لأ وده اللي هيكون الشريك ورفيق الدرب فعلاً واللا لأ) ثم مرحلة ال Exclusivity (أنا بتاع العلاقة دي بس وفى العلاقة دي بس!) لكن هو كان بينط من مرحلة الأعجاب لل Intimacy .. حرفياً من مرحلة الجنين فى بطن أمه لشاب عايز يتجوز بدون ما يمر بمرحلة المراهقة والطفولة.

الحاجة الثالثة: أنه يدي لنفسه وقت لمرحلة التعارف بشكل صحيح ويكون فى علاقة واحده فقط بدون ما يفتح على نفسه أي backdoor ودي بيعملها الشخص اللي بيكون فى علاقتة بالأولي وبيدور على الثانية ويحط استبن للثالثة بحيث لما يسيبها يلاقي غيرها!!!

الحاجة الرابعة: أنه يسمح لمخه بتفعيل خاصية ال Self-correct وهيا أنك لو بتنشل على هدف ومجيبتهوش مخك هيحاول يفهمك أنك كنت محتاج تصوب أعلى/ أسفل/إيمن/ أو إيسر الهدف.. للأسف فيه أشخاص مع أبسط خلاف ينهي العلاقة ويدخل جديدة وبالتالي عمره ما هيتعلم وهيفضل يهد علاقة ورا الأخري لأنه منع عن نفسه نعمه ال Self-correct.

طيب يا سيدي.. أنا نهيت علاقاتي خلاص.. وبقيت بلا علاقات متعدده.. وعرفت السبب وعالجته وعايز أبدء على نضيف.. أعمل أية بقي؟

جراي هنا بيقول لما تنتهي علاقة.. بندي لنفسنا سنة على الأقل.. وده معناه أن مفيش حاجه أسمها تسيب أحمد الثلاثاء بالليل.. تنساه الأربعاء والخميس تكون مع محمود.. ولا حاجه أسمها الست متتنساش إلا بست.. انت مش بتبطل بيبسي بكوكاكولا!

حلو.. حلو.. أعمل أية بعدها بقي؟

ببساطة.. تتطمن!!

تتطمن وتعرف أن فى الوقت اللي أنت بتدور على شريكة حياة كزوجة صالحة على الجانب الأخر فيه بنت ذو خلق بتدور على زوج صالح.. وفى الوقت ده أول مطلوب منك أنك تعد نفسك أنك تكون الزوج الصالح ده.. ووقت ما تكون جاهز لده هتلاقوا بعض.. بس وأنت داخل العلاقة الجديدة.. أهم قاعدة تعرفها هي

SOULMATES ARE NOT PERFECT!

الشريك البرفكت اللي بينور فى الضلمه تقدر تلاقيه فى شخصية واحده فقط فى مكان واحد فقط.. وهي الحور العين فى الجنة أن شاء الله!! لأن أنت مش Perfect ولا أنا Perfect ولا اللي شايفة Perfect برفكت أصلاً ولو برفكت فى حته فهو مش برفكت فى التانية.. أنت هتاخد Package.. خليط من الحلو والوحش، الخير والشر، النجاح والفشل، السلبية والإيجابية، وهكذا.

زي وزيك وزي كل البشر!

مشكلة الشخص متعدد العلاقات (شاب أو بنت) أنه بيشرب من بحر.. مياه مالحه لا مناسبة للشرب ولا هتروي عطشه وكل ما شرب أكتر كل ما عطش أكتر لحد ما نهايته حسب ما شفت بعيني مع متعددي العلاقات:

أما مرض جنسي.. أما مشتت بين علاقات لا تثمن من جوع.. أما وحيد بلا علاقة.. أما قرار حقيقي بطلب مساعدة لحل جذري لمشكلته ودي بتاخد شهور على الأقل.

كل الخيرات قدامك.. بس خليك فاكر.. أن متعدد العلاقات عمره ما بتملي عنيه واحده.. والله حتي لو راح اتجوز على مراته مش هتملي عينه.. عمري ما هنسي حد قالي فى مره أنا متجوز تلاتة وبدور على الرابعة.. أة والله!! بس للأسف مكنش لسه شاف أن المشكلة مش فى التلاتة وأنة محتاج بس يقف واقفه صدق مع النفس.. بأعادة لكل الحسابات من الأول من أول هو عايز أية من العلاقات دي ودخلها ليه وعلى أساس أية وأية أحتياجاته وهل أشبعت فى العلاقات دي واللا لأ وبيدخل علاقات تانية ليه ومليون سؤال علشان ينهي الصراع ده مع نفسه.. لأن للأسف.. متعدد العلاقات صراعه أما مع نفسه أو مع ماضيه وعمره ما كان مع الأخر!

Post Original Date:  Feb. 18, 2021
FB Post's Link: https://www.facebook.com/daghash.eslam/posts/10219406592015934 Photo Source: https://pixabay.com/