لغة العلاقات الانسانية!

 العلاقات الإنسانية ليست بيئة معمل يقاس فيها كل شيء ب ١ و ٢ و ٣. فى العلاقات الإنسانية معندناش مسطره نفضل ماسكينها للأخر لو جيب لحد ٦ من ١٠ على قيمي ومباديء كدا أنت معي وأن لم تكن معي فأنت ضدي.

فى العلاقات الإنسانية معندناش لغة الأرقام.. ولا نستطيع كبشريين تفسير كل شيء وكل فعل وكل سلوك والمحاولة وراء الدعبسه جوا النوايا نفسها!

دي كدا مش علاقة ولا حد أبداً يقدر يستحمل أنه يكون تحت المجهر ٢٤ ساعة يتحاسب على النفس اللي بيتنفسه!

فى العلاقات البشرية.. لو أفترضنا هنجيب ١٠٠٠ مشكلة نحللهم فأعتقد والله أعلم أني مش هلاقي أقل من ٩٠٠ مشكلة منهم يندرج المسبب فيها عن ال Unintentional impact اللي بيحصل مني ومنك ومنها ومنه ومنهم ومننا كلنا!

لأنه اللي اتأخر عليك وارد ميكنش أبداً لا قاصد ولا متعمد ده.

ومديرك اللي نقلك فى حركة الترقية الجديدة وارد جداً جداً يكون ده جاي من فوقه مش بمزاجه ١٠٠% يعني!

حتي الأزواج نفسهم.. وارد نلاقي مشكلة فى علاقتهم مش بتاعتهم على فكرة!!! زوج مرعوب من كلمة حما فتيجي حماته زي الفل و١٠٠ ١٠٠ فتيجي تكمله مره بعشم! يترجمها تدخل ومحاولة للتحكم وكذا وكذا فيغير معاملته معاها ويزعل ويعاملها وحش فيروح يقول لأهله فهما كمان يزعلوا ويعاملوها وحش وتيجي المسكينة تدور على أية حصل لكل ده!! مش لاقيه حاجه غير نصيحة صادقة أتقدمت صح وفى توقيت صح وبأسلوب صح بس الشخص هو اللي مخاوفه قتلاه من كلمة حما فكان لازم يترجمها كدا!

فى العلاقات الإنسانية.. الدنيا علشان تمشي محتاجه أنا أعديلك شوية وأنت تعديلي شوية.. أنت تتغافل مره وأتنين ومفيش مشكلة أنا أتغافل ٣ و٤ و٥.

فى العلاقات الإنسانية.. لو هيكون فيه منافسه ولو نقل بين زوجين فهتكون المنافسة على مين يبني، مين يساهم ويشارك بشكل أفضل، مين هيحط من وقته وجهده أكتر فى العلاقة دي.. مين كمان ٥ سنين هيقول للتاني أنت اللي ساعدتني أكبر أكتر ولولا وجودك مكنتش وصلت للمكانة دي.. لحظة بتساوي كتير والله ومحروم منها ناس كتير أوي منتظرين أن التاني هو اللي يجي يبادر وهو اللي يصالح وهو اللي يكبر وهو اللي يتغافل وهو وهو وهو.. طيب ما لو كل واحد هيشوف التاني يبدء هو ويصالح هو ويتنازل هو.. رايحين على فين بقي؟

قدامك طريقين فى العلاقات.. طريق اللي عايز يبني وده من بداية العلاقة هو عارف نفسه كويس أنه داخل العلاقة دي أمام الله يقدم أفضل ما فى وسعة فيها وداخل بنيه الديمومه وداخل بنيه استثمار أفضل ما عنده من وقت جهد ومال فى العلاقة دي.

أو الطريق التاني.. طريق أنك تمسكله الورقة والقلم والمسطره على أصغر غلطه.. أنك تحاسبة حساب الملكين على كل شيء يقصد ميقصدش هو الغلطان.. وفيه حقوقي وحدودي دول أول حاجه وحقي ثم حقي ونفسي ثم نفسي ويولع الأخرين والتراحم فى العلاقات بتاع الناس الضعفاء.. أول ما توصل المرحلة دي.. أعرف أن العلاقات عندك بقت كانها ساحة حرب.. وانا وهو وهم وهيا أول ما هنشوف ده منك.. هناخد ديلنا فى سنانا ونطلع نجري لأننا داخلين بنيه البناء أنت داخل بنيه تاني.. داخلين بنيه التراحم وأنت داخل بنيه تاني.. داخلين بنيه المودة والرحمة وأنت داخل بنيه محكمة الأسرة ولو مجابلتيش حقي منك مع أول مشكلة هطلب أجتماع مجلس الأمن (العائلة مثلاً) واللي هتكون محضرهم من بدري طبعاً هما وأي حد يثبت ليك أنك على صواب وليس خطأ لأنك نفسك وقتها هتجري من أنك تسمع أي حد يقولك انت على خطأ.

الطريقين قدامك.. والقرار قرارك.. بس خليك مستعد للضريبة.. اللي هتتحملها وحدك.

Post Original Date:  June 11, 2021
FB Post's Link: https://www.facebook.com/daghash.eslam/posts/10220180529483887 Photo Source: https://pixabay.com/