أمبارح بتكلم مع زميلتي علشان شغل معين بنعمله.. فلما جينا عند الحته بتاعة
How to deal with other gender
قلتلها انتي شايفه الكلام ده ينفع يطلع للمجتمع مره واحده؟ أقسملك لو خرج للمجتمع مره واحده نص البيوت اللي هتشوف ده ممكن حرفياً تتهد.. رفع حالة الوعي مرة واحده بالشكل ده لو حصلت فخسائرها أكثر من مكاسبها لأن فعلاً مجتمعنا فيه حتت فيها تحت الصفر.
أفتكرت من الحالات اللي عدت عليا زوج رجع من برنامج تدريبي خاص.. الزوجه من كتر ما شايفه تغير فى معاملته شاكه أنه يا بيخونها يا متجوز عليها .. ما هو مش معقوله رحت أخدت برنامج تدريبي شهر يعمل فيك كدا فأنت أكيد بتدبر ليا حاجه.
فضلت واقف كتير قدام المثال ده وعمري ما هنساه!
العين من كتر ما شافت الوحش مش قادره تصدق أن فيه حلو!
وفاكر أستاذه لينا بعد برنامج تدريبي من كام شهر فاتوا وهيا بتقولنا الشاب اللي مش متجوز فيكم وهيعرف يتعامل زي ما الكتاب بيقول كدا هيتشك فى امره لأن مش دي طبيعة الشباب هنا فتعاملوا بحذر... والبنت اللي هتعرف تتعامل فيكم زي ما اخدت فى التدريب ده وارد يتشك فى أمرها فتعاملوا بحذر... بنت أعترضت.. قالتلها يا بنتي أنتي فى مصر مش فى أوروبا ولو أنتي من مجتمع الكومباوندات فبرا الكومبوند احنا لسه فى مجتمع البنت لو الزوج حس ف أول الزواج أنها فاهمة شوية فى الجنس فيه بعض العقول هتشك فيها ده بين الزوجين فى أقدس علاقة.. فما بالك فى أمور التعامل العادية اللي عقول بعض الذكور تخاف من البنت اللي بتعرف تتعامل كويس بحجه أنها خبره فى الشباب بقي!
وأستغربت جداً أن فى Assessment يقيس مهارت التعامل مع الجنس الأخر والأخطاء اللي بيقع فيها كل طرف.. كان فيه شاب ف القاعة واقع فى ٤٤ خطأ من أصل ٦٠ وبنات معظمهم عنده من ٢٠ ل ٣٠ خطأ فى التعامل مع الجنس الأخر!!! وقتها عرفت أن فعلاً البنت اللي فى القاعة واقعه فى ٦ أخطاء بس كان بيتبصلها بصات عجيبة والشاب اللي كان واقع فى ٨ أخطاء كان يا بيتبصله بصات أنت أزاي شاطر كدا.. يا بيتخاف منه (وده كان شيء أول مره الاحظه بالشكل ده)
أحنا قدمنا شغل كتير أوي... شغل اللي عايز يشتغله مفترض
ينسي مين هيقول أية وهيتشاف أزاي ويشمر وينزل المعركة ويحتسب أجرها.
لأن كدا.. الحرب بقت أكبر وأصعب لأننا داخلين حربين.. حرب أسمها رفع حالة الجهالة.. وبعدها بقي ربنا يكرمنا ونبقي ندخل حرب رفع حالة الوعي!
فضل كل طرف يدور على حقوقه بس حقوقه بس حقوقه بس وزودوها بموضه حدوده بس حدوده بس حدوده بس.. لحد ما اتنسي عن العلاقات كل شيء صحي لدرجة لو بس سألت شاب أو بنت ٣ أسئلة بيحتاس فيهم والله!
أية واجباتك تجاه شريك حياتك؟ وأية حقوقك؟
يعني أية طاعة وقوامة وأزاي تطبقهم دون افراط أو تفريط؟
يعني أية علاقة صحية تبدئها مع نفسك قبل ان تبدئها مع الأخر؟ وأمتي وقت المشكلة تعرف أن أنت المتسبب فيها واللا الطرف الأخر؟
تخيل ان دي أسئلة بديهيه لبني آدم يبني بيت! تخيل بقي أن غالبية الشباب والبنات معندهمش أجابة صحيحة للأسئلة دي!
بس لو سألتهم عن الكام موضه التانية زي الحدود والنرجسية والعلاقات السامة يكتبوا فيها كتب .. فوصلت عينهم فى رحلة بحثها عن السيء... ونسيوا يروحوا يتعلموا أزاي ينتقوا الجيد!!!
لسه قدامنا كتير.....
Post Original Date: June 8, 2021
FB Post's Link: https://www.facebook.com/daghash.eslam/posts/10220159119068640
Photo Source: https://pixabay.com/
No comments:
Post a Comment