Honesty without compassion is Abuse!

 Honesty without compassion is Abuse!

دي مقولة من حبي ليها مش بس بحاول أطبقها بل بقيت بحاول أعلمها للمتدربين فى كل ورشة وفى كل مكان أروحه لدرجة أنها بقت بالنسبة ليا دستور حياة.

Honesty without compassion is Abuse!

مقولة تقيله ها!!!

تعالي ناخد كام مثال حقيقين من على أرض الواقع لناس أعرفها شخصياً:

مثال ١: بنت عندها مشكلة فى أنها تشوف الجمال فى الناس وفى الحياة.. كان عندها Tasks فى رحلتها العلاجية والتطويرية تعملها من ضمنها أنها هتعمل لنفسها تحدي تكتب فيه لكل يوم حاجه جميلة فى الناس او فى الحياة وتشاركها على الفيس بوك.. دخل شاب كتبلها أية اللي بتعمليه ده هههههه.. ده ناقص تحضريلنا عفاريت ههههه... وأنتي هتقعدي كل يوم بجد تكتبي كلمتين زي دول.. دي من نوعية يعني أقفي قدام المراية وقولي أنا حلوة وزي الفل وكدا؟

النتيجة: البنت فى اليوم الثالث فقدت رغبتها فى أنها تكمل ده.. اللي هو كان بمثابة أهم شيء فى رحلتها العلاجية والتطويرية أنها تشوف الجمال والخير والجدعنه من حولها فى الناس وتأكدت لها قناعتها مع الناس!

مثال٢: شاب قاعد مغترب.. لسه بيتعلم يعمل أكل.. عمره ما سلق بيضه فى بيت أبوه!! وجرب يعمل بيتزا لوحده وفرحان بيها وحطها على الفيس.

يحصل أن الناس كلها تدخل تقوله أية القرف ده.. أية العك ده.. شفت بعيني بنت كاتبه منك لله قرفتنا فى الأكل.. واللي كتبله ما تشتري أرخص يا جمدان وبتاع!

ومن مبدء لو معرفتش تبني متهدش دخلت كتبتله التعليق اللي فى أول كومنت.

ببساطة.. ودون التطرق لموضوعات علمية عميقة يعني أية

Honesty without compassion is Abuse!

أسمحلي أوصلك المعني بشكل مختلف.. كلمة Compassion معناها تراحم والتراحم ده مكون من حاجتين:

Empathy & Help

ودول مستحيل تقدر توصلهم لو أنت أسهل حاجه عندك الأحكام على الأخرين.. روح أتخلص من العادة دي اللي بشوفها أسهل طريق لجنهم الأرض والسماء وهي الأحكام على الأخرين بتبعيتها.. ودي هتكون أول وأهم خطوة فى تطبيقك للتراحم.

تعالي أديلك قصص واقعية من قلب الجلسات:

الحالة١: بنت منقبة بقت ملحده... بتقول أنا مش فاضل غير القماشة دي ولو قلعتها صدقني انا هبقي بني ادمه تانية خالص وهعمل كل حاجه كان بيتقالي أنها غلط فى يوم من الأيام.

الحالة٢: جاتلي فى بداية حياتي وكنت لسه مش بشتغل فى تخصص العلاقات فأتصلت بحد أكبر مني بعد استئذانها وحكيت ليه الحالة وقلتله استئذن حضرتك أحولها عليك لأني مش هقدر أثق فى غيرك فى مشكلة بهذا الثقل فكان رده "أية يا إسلام ده!! البنت مبوظه نفسها!! ده مفيش علاقة واحده فى حياتها مع راجل عدله!! لا مدير ولا اب ولا اي زوج اتجوزته ولا اي حد بيمثل سلطة أبوية من وجهه نظرها.. دي عمرها ما هيدوم ليها علاقة بالشكل ده مع أي راجل.. دي مش محتاجه جلسات!! دي محتاج هدد لبنيانها النفسي كله ونبدء من جديد وهتحتاج على الأقل تخصصين مع بعض جلسات لمدة سنة وأكتر!"

ها... أية رأيك لو رحت وصارحتها وقتها بالكلام ده قبل ما تتعالج وتبارك الله تأسس أسره ناجحه دلوقتي؟ دي كانت انتحرت على الحالة اللي كانت فيها!!!

الحالة ال٣: شاب ملتحي بيقولي شايف دي؟ دي مجرد دقن علشان البنات مش علشاني.. أنا خاربها مع البنات وفيه حرب جوايا لما تشوفني بنت أني متدين وتقعد تشكر فى شكل التزامي وأنا خاربها حقيقي على الأرض بهزار وتلامس جسدي وكل بنت شوية.

ها.. أية رأيك بقي؟ شايفهم أزاي؟

الحقيقة.. أنه المفترض.. لو هنطبق مفهوم التراحم يبقي حضرتك ليك رأي فى حاله واحده فقط.. لو رأيك هيبني ومش هيهد.. هيساعدهم للأنتقال للمستوي التالي فى حياتهم وعلشان ده يحصل هتعمل الأتي:

- هتكلمه بنصح أمين على أنفراد لأن الكلام فى السر نصيحة وفى العلن فضيحة.

- هتكلمه بمبدء مهم جداً وهو الحزم مع حسن المعاملة.. واتشالت حسن المعاملة دي يبقي أنت كدا قلبت Aggressive عدواني وده محرم تماماً فى فكر التراحم.

- هتشوف فين أخر حدود المساعدة عندك وتساعد أمام الله بما استطعت ولو فيه حد أفضل منك فى المساعدة فى الحته دي هتحول عليها مباشرة.

يا صديقي.. صدقني الصورة اللي قدامك والسلوك الظاهر ده تحت منه جبل جليد كامل... جبل مكون من معادله وحسبه طويلة عريضة مكونه من تربية وتنشأه وظروف أجتماعية وخبرات حياتية مر بيها و١٠٠ حاجه جوا المعادلة دي كان نتاجهم الشخص اللي قدامك ده!

فالحقيقة ضرب من الجنون والخيال هو أن شخص يوهم نفسه أنه يعلم ويقرأ ما ورا السطور ويحلل أفكار الأخرين لأنك يا عزيزي ما حييت لن تري الصورة كاملة!!!

وبناءً عليه:

المرة الجاية وأنت جاي تلبس ثوب الحاكم ذكر نفسك دائماً أنك يا عزيزي لو نشأت نشأتهم ومررت بنفس تجاربهم لربما سلكت نفس مسلكهم.. أن لم يكن أسوء.

تاني.. حتى ولو محق.. فالحق ليه أصول.. والنصح ليه أصول.. ولو تعدتها يبقي أنت وقعت فى المقولة المؤسفة دي:

Honesty without compassion is Abuse!

Post Original Date:  Feb. 15, 2021
FB Post's Link: https://www.facebook.com/daghash.eslam/posts/10219389373905492 Photo Source: https://pixabay.com/