يتجوز الشخص.. يلاقي كل اللي أتحرم منه فى عائلته موجود فى عائلة زوجته.. تزعل عائلته جداً أنهم خدوك مننا.. بقت كل حياتك معاهم.. بقيت خروجات وفسح وسفر وقعداتك كلها معاهم.
طيب.. يا جماعة محدش سأل نفسه ليه؟
يعني مخدتوش بالكم أنه كان فى وسطكم كل قعده ليكم بخلاف وكل قعده ليه مع عائلة زوجته بضحك وهزار وينسي الدنيا فى وسطهم؟
يعني مخدتوش بالكم أنه أتعوض بشيء كان محروم منه طول عمره وكانت رحمة ربنا بيه أنه يبعتله عائلة زي دي يتزرع فى وسطهم ويدوق اللي أتحرم منه سنين بعد ما أتبدل معاهم كل شيء؟
كان بلا مكان وبلا وطن وبيدور على ده سنين.. لقي المكان والوطن.. كان وكان وكان ولقي كل ده هناك.. حتي الصقيع الأسري اللي كان فى وسطكم أتبدل بدفء أسري فى وسطهم؟
الطبيعي يا جماعة فى النفس البشرية أن الأقرب ليها مش هو الأقرب قرابة على ورق.. بل الأقرب ليها هو ب عمل أية فى حياة الفرد، فرق فيها أزاي، أضاف ليها أية! ولذلك طبيعي جداً أني أقابل بنت لما أبوها يتوفي تحزن.. بس لما عمها أتوفي وقفت حياتها لشهور وسنين.. ليه؟ برغم أن والدها هو القرابة الأقرب ليها من عمها إلا أن عمها كان مدخلها للحياة فى كل شيء، مات عمها.. فاللي كان قدوة وكان مرجعية وكان مدخلها للحياة خلاص مبقاش موجود.. فوقفت الحياة!
تاني.. الأقرب لينا.. مش الأقرب على ورق.. الأقرب لينا ب هو عمل أية فى حياتنا، أضاف ليها أية، فرق فيها أزاي، كنا فين قبله وبقينا فين بعده، أشبع عندنا أيه فى منظومة أحتياجتنا.. فياريت قبل اللي منك ما يبعد.. وميبقاش منك ويبقي مع ولحد تاني.. نراجع نفسنا الأول.. جايز.. جايز المرة دي نشوف الصورة بشكل مختلف.. وجايز.. جايز.. منطلعش برضوا ضحايا زي ما بنحاول نلعب ونكذب على نفسنا فى كل قصة علشان منشيلش وجع المسئولية وضريبتها!
Post Original Date: Aug. 3, 2021
FB Post's Link: https://www.facebook.com/daghash.eslam/posts/10220488210495720
Photo Source: https://pixabay.com/
No comments:
Post a Comment