يمكن يكون مشهور جداً عني أني ٩٩٪ من شغلي مع Class A.. الفئة العليا فى المجتمع علمياً و ثقافياً ومادياً وأجتماعياً.. ودي حقيقية .. تقريباً تلتين العملاء عندي هتلاقيهم طبيب، ظابط، باحث، كوتش، مدير، بيزنس اونر.. أستاف جامعة.. الى أخره.
أنا فاهم كويس مشاكل الفئة دي.. وبعرف أحقق فيها نتائج على الأرض وبسرعه وبجودة عالية.
وعلى الأرض برضوا.. واللي أول مره أكتبه هنا.. أنا بقالي ٨ سنين عملي التطوعي فى المجال الطبي.. واللي شفت فيه العجب العجاب!
شفت اللي أفقر خلق الله مادياً.. بس ساتر نفسه بالعفاف.
شفت اللي طلع بنته من طب أسنان علشان مقدرش يتحمل مصاريفها ودفن حلم البيت كله فى الدكتوره.
شفت اللي كل مشكلتها مع جوزها تتحل بحاجه واحده بس!! ١٠٠ جنية فى الشهر زيادة على المصروف!
"يزودني ١٠٠ جنية يا باشا.. العيشة غليت.. لو زودلي مصروف البيت ١٠٠ جنية أهه أعرف امشي شوية.. ده انا فى عز الشمس بلف السوق كله علشان اشوف الارخص ربع جنيه واشتريه وأقول اهه ربع جنية على ربع جنية يجيبولنا يوم بحالة عيش.. العيشه غاليه يا باشا"
شفت حالة تعبت تعب شديد فأخدناها ودناها للدكتور.. تحاليل وعلاج ومتابعة و و و.. الدكتور شاكك فى أكتر من تشخيص من خطورة الحالة..
طيب أنتي كدا من أمتي يا حاجه؟ .. مش عايزه تقول.. اسئلة الدكتور كنت شاكك أنها بتكذب فى اجابتها
لما اتكلمت معاها وأتطمنت.. حكت!
"أقول أية يابني؟ .. أقول للدكتور الحقيقة أني شحت شوية رجول فراخ.. معرفش كانوا مغيبين عند الراجل واللا أية.. بعد ما كلتهم جالي التعب ده كله"
بالمناسبة نفس الست اللي بتروح ب ٢ جنية ونص تجيب شوية أجنحه فراخ + كام رقبة فرخه وتعملهم للعيال ويحتفلوا اننا هناكل فراخ النهاردة!
طبعاً مش هكلمك عن شفت أية فى علاج الأورام، المناعة، أمراض الدم النادرة، العمليات العاجلة، الحالات الحرجة، علاج الأدمان.. لأن دول الكتابة عنهم مؤلمه أوي.
وطبعاً كل دول كان أكبر اللي بيوقف علاجهم قله الفلوس.
تجربتي فى العمل التطوعي فى المجال الطبي واللي أشتغلت فيها مع ناس تحت تحت تحت خط الفقر... وتجربتي فى العمل مع الفئة العليا فى المجتمع.. حقيقي ربتني من أول وجديد!
ربتني وربت جوايا قناعة تامه.. أن كل واحد فينا أخد ال٢٤ قيراط بتوعه!
خلتني مبعرفش أشتكي!
مبعرفش أحسد، أقارن نفسي مقارنة سلبية بحد، أو حتي أقول كلمة يا بخت فلان!
وأخر قناعة أتربت جوايا بعد شغلي فى حياة الناس يومياً..
أنه من أمتلك ال٣ نعم دول وكأنما ملك الدنيا:
١- الصحة.
٢- الستر.
٣- راحة البال.
أنا وأنت يا صديق أخدنا ال٢٤ قيراط بتوعنا كاملين.. خلاص.. رفعت الأقلام وجفت الصحف!
بس ممكن يكون جه ضمن ال٢٤ قيراط كام قيراط أراضي بور.. وقتها قدام كل واحد فينا يختار أختيار من أتنين:
١- يشتكي.
٢- يتقبل وجود كام قيراط بور فى ال٢٤ قيراط.. يسعي ويزرع ويزرع وملهوش دعوه بالنتيجة.
وأه.. بالمناسبة برضوا..
نفس الأثنين اللي هيقرروا يزرعوا.. واحد هيجيله رزق ١٠ أضعاف اللي يستحقه.. والتاني جايز جداً يفسد المحصول كله! أيون.. حتي لو عمل ١٠٠٪ من السعي المطلوب!
ليه يارب؟
طب أشمعنا يارب؟
لا دي مش بتاعتنا.. لأننا عبيد لله.. ومن التأدب مع الله الا نحاسبه!
محتاجين يا صديق نتقبل ما رزقنا به الله.. نتقبل لو فيه جزء من ال٢٤ قيراط بتوعنا بور.. ونتقبل أننا هنسعي ونسعي ونسعي سعي مع ثقه.. ونزرع ونزرع ونزرع.. وملناش دعوه بالنتيجة.
الحمدلله الحمدلله الحمدلله
Post Original Date: July 20, 2019
FB Post's Link: https://www.facebook.com/daghash.eslam/posts/10214856017374412 Photo Source: https://pixabay.com/
FB Post's Link: https://www.facebook.com/daghash.eslam/posts/10214856017374412 Photo Source: https://pixabay.com/
No comments:
Post a Comment