سيتعلم أبنائي من خلالي الحياة!

 الأب بيلعب دور محوري ومهم جداً فى حياة أبنائه.. كأب تقدر تفكر نفسك بشكل دائم قاعدة بقولها لنفسي دائماً "سيتعلم أبنائي من خلالي الحياة"

والجملة دي لو أتحطت معظم الوقت قدام كل شاب حتي من قبل الجواز حقيقي حقيقي هتفرق.. لأن زي ما بقول دائماً

" أول خطوة بتاخدها ضد أبنك هيا أختيارك لشريك حياة غير مناسب ليك"

وبالتالي.. مفهوم أن أبني سيتعلم من خلالي الحياة هيخليني أقف قدام نفسي وأراجع وأقيم حاجات كتير أوي تبدء حتي من أول هاخد أية معايا من تربيتي ومن بيت اهلي وأية هسيبهلهم هناك.. شكراً ليهم أنهم ربونا باللي يعرفوه ولو كانوا يعرفوا أكتر كانوا علموهولنا.. بس ده مش مناسبني ولا هيناسب البيت اللي بحلم بيه اسرة بسيطة مليانة دفء وضحك وكلها كتاب مفتوح قدام بعض وكل واحد فيها بيساعد التاني للأرتقاء للمستوي التالي فى حياته... وعلشان كدا أنا شايف أني محتاج أتعلم ١ و ٢ و٣.. فياخد الشخص خطوة تغير حقيقية.. فيروح يقرأ ويفهم وخاصة لو هو كان خارج من بيت متعلمش فيه صورة الأب بشكلها السليم.

أو طبعاً يختار أختيار الضعفاء ويكمل السلسلة ويربي زي ما أتربي وخلصت.. وجيل مشوه لجيل مشوه ويتحقق فى أولاده مقوله معظمنا ضحايا لضحايا والمسكين ياخده حجه بقي.. والله انا اتربيت كدا وهو ده اللي عرفته وشفته.. طيب وأية منعم تتعلم وتشوف الأحسن والأفضل؟ طيب مين هيكسر أول حلقة من السلسلة.. طيب... طيب..!!

بالرغم من أن فيه حاجه فى التربية مهمة جداً أسمها Developmental Stages وهي مراحل وتطور نمو الطفل من أول كونه رضيع لطفل لمراهق.. إلا أني علشان البوست ميطولش هحاول أعممها شوية وأقول أن من وجهه نظري أسهل طريقتين للطفل فى المراحل الأولي من حياتة يشوف من خلالهم العالم من خلالك هم:

- من خلال الألعاب / القصص/ المحاكاة وهكذا.

- أو learning by modeling ببساطة أنه بيشوفك.. يتعلم منك.. يقلدك ويعمل زيك.. ما أنت بقي ال Figure of authority بتاعة فى الحياة الأول أو الأهم!

لحد هنا كويس؟ كويس.. كمل بقي.

بحكم أن أبني بيتعلم من خلالي الحياة (وليس مني) فمهم جداً أفهم أن طبيعي فيه حاجات هعرف أقدمها ليه وحاجات ممكن أعمل فيها تفويض لأي حد تاني.. يعني أنا مش أحسن حد يعلم ابني كذا.. ولكن الأم افضل مني فى ده فهفوض ليها ده.. عم الطفل أفضل مني فى ده فهفوض ليه ده.. مش مهم مين عمل أية قد ما المهم طفلي أتعلم فى الجزئية دي أية واتعلمها بأنهي جودة.

وبرضوا لحد هنا مفيش مشكلة.

طيب فين المشكلة بقي؟

المشكلة فى الجزئية بتاعة ال learning by modeling!!!

أن أبني هيشوف العالم من خلالي!!!

تخيل كدا شاب بخيل.. بخيل فى المال والعاطفة (ودي أكتر ناس بكرهها باعد بيني وبينهم ربي بعد المشرق والمغرب) معتقد هيكون كريم مع زوجته وأولاده؟

بشكل عام بنقول العلاقات هيا العلاقات!! يعني البخيل قبل الجواز بخيل بعده.

العصبي مع الزميل عصبي مع العميل هيكون عصبي (فى معظم الأحيان) مع الزوجة ومع الأولاد.

اللي مبيعرفش يثق فى الناس.. لحظه بقي.. كمل أنت كدا الجملة؟

اللي مبيعرفش يثق فى الناس (.........) يثق فى زوجته، أولاده.. وعلى هذا المنوال فقس.

أب بخيل بالرغم من أقتداره جداً مادياً.. تفتكر الطفل ده هيتعلم أية قناعات عن المال؟

أب مبيعرفش غير يزعق ويشخط وعصبي جداً فى كل تعاملاته مع الأخرين وبمجرد دخوله البيت حرفياً يقلبه لمحكمة فيها قاضي بيحكم أو أستاذ جامعي بيقيم وبينتقد.. الأبن ده شاف وعرف أية عن العلاقات؟ وخاصة خاصة خاصة عن كيفية معاملة الست.. اللي بتلعب أم ليا وزوجة ليه؟ طيب لما يتجوز ويقع فى خلاف مع زوجته؟ هيقول أول لغة لحل الخلاف أية؟ برافو.. زعيق ولوم وخناق!!!

وهنا نوصل لأحدي أهم النقاط.. كأب.. أنا مسئول أعرف ألعب أنهي دور.. أزاي وأمتي.

تخيل معايا كدا..

أنا أب (بيشتغل) ظابط.. عايش دور الظابط حتي فى بيتي.

أنا أب (بيشتغل) أستاذ جامعي.. عايش دور الحياة البحثية والأكاديمية والنقض والتقيم حتي فى بيتي.

أنا أب (بيشتغل) قاضي.. فعايش دور القاضي حتي فى بيتي.

يا الله على القهر!!!

لذلك فيه عشرات الادوات اللي بنشتغل بيها حينما يتعلق الأمر بالتواصل ودون الأطاله بنوصل فى النهاية أن الأب ده بيعرف نفسه

الموقف ده يستدعي مني ألعب دور أية؟

فلنقل دور أب راعي.

ثم يسأل نفسه كأب::

طيب أنا فى الموقف ده كاب راعي:

أية واجباتي؟

أية حقوقي؟

أية حدودي؟

تعالي بقي نشوف كدا:

أنا ظابط.. بلعب دور ظابط هناك فى الشغل.. Here and now أنا أب بلعب دور أب.

بل وبنتطرق لأعمق من كدا شوية

أنا أب بلعب دور أب بس Here and now الموقف ده يتطلب مني ألعب دور الأب الراعي والأب الراعي دوره كذا كواجبات، وحقوق، وحدود.

أنا أب بلعب دور أب بس هنا ودلوقتي الموقف ده يتطلب مني لعب دور الأب الناقد (وطبعاً بنعلمه أزاي حتي ينتقد) ودور الأب الناقد بيتطلب مني كذا كواجبات، وحقوق، وحدود.

أنا أب بلعب دور أب بس هنا ودلوقتي هخلع كل رداء الوالدية.. وهلعب دور صديق مقرب لأن الموقف يحتاج مني ده... إلى أخره.

وهنا وبشكل دائم فيه قاعدة بنستخدمها فى اماكن كتير اوي فى العلاقات والتربية بل حتي فى اتخاذ القرارات بشكل عام وهي

BE AWARE OF EXTREMES

لأن وببساطة فى أي دور لو هدي ١٠٠% حرية لبنتي بدون قوانين أو حدود أو أو فده أكبر مفسده ليها.. ١٠٠% قيود وتحجيم ومسك على ابني ده أكبر مفسده ليه.. وهكذا.

الخلاصة:

- دورك كأب.. بيبدء من بدري أوي.. من قبل حتي ما تعرف مين شريكة حياتك.. وعلشان كدا محتاج تفكر نفسك بالأتي: "سيتعلم أبنائي من خلالي الحياة" ... و "أول خطوة بتاخدها ضد أبنك هيا أختيارك لشريك حياة غير مناسب ليك"

- محتاج تعرف هتاخد أية من بيت والديك وهتسيب ليهم أية هناك.

- محتاج تعرف اية اللغات اللي بتتكلمها وأية اللغات اللي عايز تتعلمها قبل ما تدخل أصلاً علاقة (لينك اللغات فى أول كومنت)

- محتاج تدرب نفسك مبدء Disconnect to Connect .. يعني هخلع رداء الوظيفة قبل ما ادخل بيتي علشان بيتي يتطلب مني لبس رداء الوالدية..

أنا عمري ما كتبت بوست عن الأب ودوره.. بس كتير من الزميلات طلبوا مني ده علشان اللي بنشوفه فى الجلسات ده والله خراب خراب حقيقي للبيوت والعلاقات بحجج واهيه.. ووارد.. وارد صدقة العلم اللي بنكتبها وهنقف بيها قدام ربنا دي تغير ولو شاب واحد.. يبني نفسه صح.. يبني أسرة صح.. يخرج أصحاء للمجتمع.. يبنوا بيوت وزواجات سعيده.. ومن هنا ننطلق.

Post Original Date:  Feb. 25, 2021
FB Post's Link: https://www.facebook.com/daghash.eslam/posts/10219458321269133 Photo Source: https://pixabay.com/