٣ أشخاص شافوا حد فى مكانة أفضل منهم بيتمنوا يوصلولها.. وليكن نجاح مادي كبير فى سن صغير أو سلطة أو جاه أو أياً يكن!
الأول: لقي غصه فى نفسه، متضايق وبيقارن حاله بحال الأفضل منه، وتنهد.. وتمرد على حاله وقال أشمعني هو يارب!
وبس.. وقف هنا مأخدش أي Action غير الشكوي والتذمر.
الثاني: كره الشخص ده، بينه وبين نفسه فضل يشكك حتي فى نجاح الشخص ده "أه.. أكيد فلوس بابي، علاقات مامي، أو أي واسطة" يالا! ناس ليها حظ وناس ليها تشتغل الشهر كله ب ٣٠٠٠.. وكل ما بقت تيجي سيرة الشخص ده بيلاقي فيه ضيق فى صدره وكأن عقله اللاواعي بيقوله أنت أفضل منه.. كنت أنت اللي تستحق المكانة دي.. احسن منك فى أية ده غير عنده بابي ومامي.
الثالث: من كل قلبه أمام الله تمني للتاني الخير يزيد عنده أكتر وأكتر ودعاله فى سره دعوه هتتردله أضعاف مضاعفة.. وراح لحد عنده وقاله: مساء الخيرات يا فلان.. سامع عنك كتير ما شاء الله تبارك الله عليك.. مبسوط أن فيه فى مصر فى السن الصغير ده ناس زيك كدا.. بص يا سيدي بقي.. أنا أتعودت لما الاقي حد أفضل مني فى حته أنا عايز أتطور فيها أروح واطلب منه الدعم والمساعدة وأسأله أنت عملت ده أزاي وأية المطلوب مني لو عايز أخد خطوات تحطني على الطريق زيك كدا.. أبدء منين وأبدء أزاي.. أنا حتي عملت ده مع فلان وفلان قبلك وكل واحد فيهم اخدت منه حاجه واتعلمت منه حاجه.. وجتلك علشان كنت عايز أتعلم منك كذا وكذا بحكم أنك أفضل مني فى الحاجات دي...
إلى أخره من حديث.
حاول تتخيل كدا.. الشخص الأول مكانه فين بعد ٥ سنين والشخص التاني فين بعد ٥ سنين والشخص الثالث فين بعد ٥ سنين!
بس... مش طالب منك أكتر من أنك تتخيل كدا لأخر السكة فعل وسلوك كل واحد منهم هيوصلهم لفين.. على مدار ال٥ سنين.. مين هيكون صاحب كل واحد فى ال٣ دول؟ أية دائرة العلاقات بتاعة كل واحد من ال٣ دول.. تخيل كل حاجه فى حياة ال٣ أشخاص دول.
بعدها.. الخيارات ال٣ قدامك.. أختار منهم السكة اللي عايز تمشيها.. زي ما تحب.. بس بعد ٥ سنين وأنت بتراجع كدا قرارك ده على فين وداك.. خليك فاكر أن القرار كان قرارك.
Post Original Date: Feb. 16, 2021FB Post's Link: https://www.facebook.com/daghash.eslam/posts/10219399713283970
Photo Source: https://pixabay.com/
No comments:
Post a Comment