تميزك الحقيقي هو نجاحك الداخلي.
أنك تعيش عيشتك أنت مش عيشة حد تاني!!
أنك تحقق أحلامك أنت مش أحلام حد تاني!!
مش أحلام صدرها ليك مجتمع أو أعلام قالك أن نجاحك هو عيشة محمد رمضان بفيلاته وقصورة فى سن ال٣٠ وحياة عمرو دياب فى سن الأربعين وحياة حسين فهمي فى سن ال٦٠ وطبعاً علشان تحقق دول تعمل أية؟ .. بالظبط.. تشتغل من أول ما تصحي لحد ما تنام أو تبحث عن أسهل طريق يوصلك للغني طبعاً!
تلاقي شاب حديث تخرج مثلاً فيحضر لمدرب مشهور فيخرج من الورشة مقرر يبقي زية!
عايز أبقي مدرب، عايز أبقي كوتش، عايز أشتغل Business Consultant.
ياااه.. هو المدرب دخله فى اليوم ٢٠٠٠-٣٠٠٠ ياااه.. يعني لو اشتغل بس ٢٠ يوم يبقي دخله ٦٠٠٠٠ أوبس! .. هيا دي! (وطبعاً دي معلومة خاطئة تماماً مفيش مدرب بيعرف يقفل ٢٠ يوم شهري)
فيقرر يدخل المجال.. ويفضل الشخص سنين يجري ورا حلم مش بتاعه!
أه شكلة من برا حلو.. فية وظائف كتير أوي كدا.
شغلانة الظابط من برا حلوة.. هيبة.
شغلانة الطيار والقبطان من برا حلوة.. لو تعرف بيقبضوا كام هتنبهر والله.
شغلانات كتير أوي كدا.. بس السؤال بقي.
يا تري الشغلانات دي تناسبك؟
يا تري عيشتهم وال Life style بتاعهم أفضل حاجه ليك؟
جايز
وبرضوا جايز جداً جداً جداً.. أنه ميكنش مناسب ليك الحياة المتصارعة دي، اللي كلها جررررررررري، حياة معظم العاملين فى الوظائف دي كدا!
جايز جداً يكون كل طموحاتك من الحياة هو الحياة الهادئة المطمئنة ووظيفة بتدخلك دخل متوسط.
ترجع من شغلك، تقعد فى أسرة مُحبة وبيت هادي فى حضن زوجة وأولاد بيحبوك وتحبهم ونوم هاديء مطمئن!
حياة زي دي جايز جداً تكون هيا الحياة اللي تناسبك وانك تقبض ٥٠٠٠ فى حياة زي دي.. ممكن نفسياً تكون أفضل من حياة دخلك فيها ٢٠٠٠٠ فى الشهر بس مش بتاعتك.. عايشها بمهديء ومنوم ومُنبه من توترها وصراعها وتسارعها ومشاكلها اللي مش بتخلص.
رسالتي ليك المره دي مفيهاش أي دعوة للكسل، بس فيها طلب مني أنك تتأكد أنك عايش حياتك مش حياة حد تاني.
لأن كلاً مُيسر لما خُلق له.
ونصيحة لوجه الله.
مش كل النصائح بتاعه ال Passion تصدقها.
ومش كل النصائح بتاعه أنت لازم تشتغل عمل حر وتعيش حر وتعمل Your own Business وتبقي يا ست البنات Self Independent Woman وتعيشي Free وحتي لو أتجوزتي فسهله يعني طلاق بسرعه وتعيشي حياتك Single Mother
قبل ما تصدقوا كل ده.. تأكدوا من الأتي:
أن الفطرة السوية لا تتعارض معاه.
أن الدين والعلم لم يتعارضوا معاه.
أنه هيساعدك للانتقال للمستوي التالي فى حياتك.
غير كدا.. أنا شخصياً لا أومن بثقل محتوي الفكر ده!
تاني.
التميز الحقيقي والنجاح الحقيقي مش نجاح شهادات.. التميز والنجاح الحقيقي هو نجاحك الداخلي فى أفضل صورة تناسب حياتك مش حياة Carbon copy من حياة حد تاني.
حياتك مش شغل وفلوس وبس.. حياتك فيها مسئولية تجاه عائلتك وتجاه اولادك وقبلهم تجاه نفسك وبعدهم تجاه مجتمعك!
ده الأنبياء يا اخي كان عندهم وقت لنفسهم!!!
!!!هتكون بتشتغل وظيفة يعني أهم من الأنبياء
Post Original Date: Oct. 15, 2019FB Post's Link: https://www.facebook.com/daghash.eslam/posts/10215486349772328
Photo Source: https://pixabay.com/
No comments:
Post a Comment