النهاردة حصل حادثة من بنت كانت ماشية عكس الأتجاه بسرعة 170 كيلو متر/ ساعة.. حد صورها ونزل فيديو الحادثة كاملة على الفيس بوك.
شوف بقي اللي جاي ده!!!!
يجي حد تاني ياخد الفيديوهات وينزلها ويكتب على الفيديوهات منك لله يا شيخه عايزه تموتي واللا تنتحري فى ستين داهيه أهه الراجل اللي مات بسببك ده فى الجنة وانتي فى نار جهنم!
فضلت واقف على الكلام... مش متخيل... أية ده!! أية كم العداوه دي!! ده دين أية واللا إنسانية أية دي اللي بتقول لما نشوف حادثة ندعي على المتوفي مش نطلبله الرحمة!!
فى مثل هذه الحالات... بنفكر نفسنا أننا ما حيينا لن نري الصورة كاملة.. مشفناش فى الفيديو صورتها كانت فايقه تماماً واللا مثلاً جالها غيبوبه وهيا بتسوق واللا حصلها أية... لو هنراجع الحقائق بشكل علمي... هنعرف أن مفيش حقيقة فى الفيديوهات دي غير حقيقة واحده فقط وهي:
تصادم سيارة مسرعة كانت تسير عكس الأتجاه بأخري مما أنتج عنها أشتعال السيارتين ووفاة السائقين!! طيب..
هل عندنا دليل ثابت حتي الأن أنها حالة أنتحار؟ الأجابة لأ!
خد بقي 100 لأ!!!!! وتظل حقيقة نيتها عند رب العالمين فقط وربما تتوصل النيابة العامة لأي دليل ينفي أو يؤكد أي شيء ولحد ده.. مطلوب منك متعملش أي شير علشان الناس اللي عندها مشاكل نفسية مع الطرق... علشان أي حد حصله حادثة ولسة بيتعالج نفسياً منها أنت كدا زودت وفعلت عنده ال Trauma أكتر من شكلها ووضعها الحالي.. علشان الأهالي اللي أولادها بيسافروا رايح جاي كل يوم بين المحافظات.. علشان متأكدتش قناعات غير حقيقية زي أهه الستات مبتعرفش تسوق شوف يا سيدي الراجل البريء اللي مات على أيد ست متهورة فأي حادث بسيط حتي لو الراجل غلطان بس عمل الحادث مع ست بقت قناعة جماعية بأن الست هيا المخطأه.. وعلشان مليون حاجة تانية!
عارف أن المخ بيحتاج يكمل الصورة من صورة منقوصه لصوره شبه كاملة.. بس خلي بالك.. هو هيكونها بناءً على غالبية معتقداتك واللي جواك أنت.. البنك اللي عندك هياخد منه.. يعني اللي جواه كويس المخ هيساعده يكون جزء من الصورة بشكل إيجابي.. واللي جواه مش كويس هيروح المخ يكون من ده.
فالحقيقة أنا واقف مستغرب قدرتنا على التدخل فى نوايا البشر والتشكيك فيها لهذا الحد اللي خلانا حتي المتوفي بنتدخل فى نيته!! يعني فيه ناس لا سلم منها عايش ولا ميت !!! ده فيه ناس قالت كلام أتهاماً فيها وشرفها!!!
نصيحة بقي لوجه الله: أول ما حضراتكم تشوفوا الناس دي عندكم على الفيس بوك.. نصيحتي أهربووووووووا.. أهربووووووووا منهم علشان هيجي عليكم الدور والله العظيم وهينالكم جزء من نواياهم بأي صورة كانت.. دا الميت مسلمش منهم!!
تاني.. نرجوكم محدش يشوف الفيديوهات بتاعة الحادثة تحت أي ظرف كان ولا حد يعملها شير رأفتاً ورحمةً بالناس اللي عندها مشاكل مع الطرق والسفر والمواصلات.
رحمة الله عليها وعلى السائق الأخر وربنا يجعلهم فى جنات النعيم شهداءً بأذنه وكرمه لا بعدله ويبعد عنا ما حيينا أصحاب النوايا السيئة اللي لا سلم منهم حي ولا ميت
Post Original Date: March 28, 2021
FB Post's Link: https://www.facebook.com/daghash.eslam/posts/10219674937604406
Photo Source: https://pixabay.com/
Photo Source: https://pixabay.com/
No comments:
Post a Comment