من سنين كنت قاعد مع ال Mentor بتاعي (بالمناسبة المنتور بتاعي ده حد ملهوش ادني علاقة بالكوتشنج).. جه شاب فى منتصف العشرينات.. أتكلم معاه فى أنه مش طايق الشغل والروتين وعايز يسيب الشغل.. بعد حوالي ٤٠ دقيقة أنهي المنتور بتاعي كلامه ب:
"هسيبك تفكر فى قرارك.. بس محتاجك ترجع البيت وتقعد تفكر مع مراتك بورقة وقلم وتخططوا لحياتكم الجاية بعد ما تنهي خدمتك شكلها أية ونتكلم بعدها"
رد بأستغراب جداً: "وهيا مراتي مالها بقرار زي ده!!!"
أستغرب المنتور بتاعي رده وقاله:
"وأمرهم شورى بينهم!! يعني هيا اتجوزتك على الرتبة اللي انت فيها دلوقتي وعارفة أن كل دخلك ٦ أو ٧ الاف وممشيه بيهم بيتها ودخل ثابت وعارفة أنك هتاخد رتبة جديدة بعد كام سنة وهتزيد كذا وهترجع محافظتك بعد ما تخلص خدمة فى الصعيد وفجأة كل ده يختفي ويتبدل وهيا مالها؟.. أسمها شريكة حياة يابني!"
الحوار ده كان أكبر سبب فى أني أروح أقرأ وأدعبس يعني أية مشاركة زوجية بين العلم والدين وبعدها ضيفت value ال Sharing فى ال Relationship Values بتاعتي.
من وقت للتاني بروح أقعد مع المنتور بتاعي ده واتعلم منه فى شتى أمور حياتي.. وكل جزء فى حياتي ليا فية كبير أروح اتتلمذ تحت رجليه واستزيد علماً.
أخر درس قالهولي:
"الراجل غالباً هو البادي فى العلاقة.. عود نفسك واتعلم من دلوقتي تكون هادي فى بيتك يا إسلام.. الراجل الهادي هو اللي بيخلي البيت هادي ومستقر ولا منفعل ولا كله زعيق وعصبيه.. الزعيق والعصبيه والنديه لو دخلوا البيت قول ع البيت يا رحمن يا رحيم.. يوم ما البيت بيكون هادي ومستقر أي انفعال ولو بسيط من أي واحد فيكم أنتم بيبان ومع رصيد الود.. ومع الأستمتاع بهدوء البيت والعلاقة.. ومع الرغبة فى المحافظة على أن البيت يفضل كدا.. لو حصل أي خلاف كل طرف هيحاول من ناحيته يصلح لأن ابن الأصول مبينساش الخير والجدعنه حتي لو أتحول الاختلاف لخلاف.
أنا بقالي ٢٠ سنة متجوز.. مفيش مرة أحنا الأثنين نمنا وأحنا متخانقين.. نختلف نتخانق نعمل أي حاجة.. بس حاجتين اخدتهم على نفسي وقت الخلاف وبقالي ٢٠ سنة ممشي بيهم بيتي:
مفيش مشكلة تبات فى حضننا وما يبات غير رصيد الجدعنه والمودة والرحمة.
ولا أجيب سيرة مراتي بكلمة سلبية قدام أي حد ولا حتي أهلها.
خليني اشارك معاك أخر زعل.
كنا متخانقين فى مرة وأهلها جم على فجأة.. فضلت أقول فيها شعر وبنتكم دي نعمة الزوجة ونعم الصديقة المؤتمنة وقد أية حياتى فرقت بوجودها.. وكذا وكذا وحقيقي كان من قلبي لأنها فعلا كدا.. أفتكر تاني.. ولاد الأصول بيبانوا وقت الخلاف. مشيوا أهلها... ولقيتها هيا اللي جاية بتصالحني وخلصت المشكلة.. بس بأني افتكرتلها الخير مجيبتلهاش القديم والجديد وكل ده مكنش هيحصل لو مكنش معايا زوجة ودوده رحيمه وبكدا بتمشي الحياة شوية عليا وشوية عليها!"
فية مقولة بتقول:
You will be the same person in five years as you are today except for the people you meet and the books you read
يعني انت حياتك كمان ٥ سنين تعتمد على بتقرأ أية، وبتقعد مع مين.
بتقعدي مع بنت بتقولك الرجالة كلهم خاينين ومستغليين؟ مبروك عليكي أوعدك بعدم الشعور بالأمان فى أي علاقة.
بتقعد مع راجل بيقولك كل الستات نكدية؟ مبروك عليك.. مهماً عملت مع أي زعل بسيط أو دلع بعتاب هتشوفها نكدية فعلاً.
ركز يا صديق مين حواليك.. أنا شخصياً كتبت فى الProfile بتاعي السنة اللي فاتت أني حواليا
Health, happy, positive, supportive, and authentic people.
ودول اللي محيطين بيا فى قعداتي وخروجاتي وكل حياتي.. ولله الحمد والشكر... والله والله حياتي من جيد إلى عظيم ومن نجاح صغير لأكبر منه.. والموضوع بيبدء بقرار.. والقرار قرارك!
Post Original Date: Dec. 2, 2020
FB Post's Link: https://www.facebook.com/daghash.eslam/posts/10218830861983043
Photo Source: https://pixabay.com/
No comments:
Post a Comment