كتب ال Self Help عنوانها باين وواضح!! كتب مساعدة ذاتية ودي بيندرج تحتها كتير من كتب علم النفس والتنمية الذاتية والتواصل والعلاقات.. ألخ.
الكتب دي بتتجاب علشان تساعدك لو (أنت) اللي عندك مشكلة تكتشفها فى نفسك ولو عرفت تحلها خير وبركة ولو معرفتش تروح لمختص تقوله كل حاجه بصراحة ووضوح وتسأله.. ها.. هنعمل أية بقي؟
مش تخبي عليه..
مش تحكيله الحكاية من جانب واحد..
مش تروح لمختص علشان تقوله اللي انت عايز تسمعه لنفسك ولا تثبته لنفسك!
فالكتب دي مش بتتجاب علشان تمشي تشخص فى الناس أو تحطهم تحت مايكروسكوب وتمشيهم بمسطره وورقه وقلم وتمشي تصنف فيهم وتحذر نفسك منهم و و و.
ده لأنه.. لو ده حصل.. ودخلت بذره شك من دي قلبك.. أقسملك أقسملك هتدمر كم علاقات باللي حواليك لا عدد له.. وهتدمرها بإيدك ثم تلقي أشكاليتها بأن الأخر هو المتسبب فى ذلك.. ومش بعيد خطوتك الجاية بعد دي.. هيا العيادة النفسية ولسنين والله!! هتفضل تلف فى دائرة ملعونه.. ولو كنت محتاج ٥ جلسات هتاخد ٥٠!
أنت لاقي وقتك وفلوسك وعمرك للدرجة دي!
تاني..
العقل البشري بيحاول كتير يثبت لنفسه أنه صح.
- المدمن فى فترة من فترات حياته شايف أنه يا سيدي ما أنا مش بأذي حد فأنا صح.
- اللي محاوط نفسه ب ٥ ٦ أشخاص بينزلوا بالليل يقعدوا على القهوة ميدوروش على شغل زي الناس ومجرد يقدموا كام CV فاضي لا خبرة ولا مهارات ولا قدرات تشدني وتخليني عايز أقابلك أشوف أزاي هتكون أضافه للشركة فيقعدوا صبح وليل يقولوا أه شوف فلان علشان واسطه دخل شركة أية وعمل أية وخلي أيه.. برضوا من كتر ما محاوطين نفسهم ببعض شايفين أن هما صح.
فلو بتدور على أي دليل يثبتلك أنك صح ... اوعدك هتلاقيه.. لأن العقل البشري كدا.. هو مصمم على أنه لو شاف صورة غير مكتملة هيحاول يكملها.
أنت لو عايز تروح تثبت لنفسك أن مصر مكسبتش فى ٧٣ أقسملك بالله (بقسم ومتعمد من ثقتي بالأدله العلمية اللى شفتها ومن كثرة تكرار ده فى شغلي) لو عايز تثبت لنفسك ده.. هتثبته.. متخيل!
عايز تشوف الدنيا فيها فرص .. هتشوفها.
عايز تشوفها ظالمه ومفيهاش فرص وكلها ظلم ووسايط و و.. هتشوفها.
اللي أنت عايزه يا صديق هتلاقيه.. ده وعد!!
حاول تقف كدا وقفه مع نفسك.. حاول تشوف فى الوقفه دي أقرب ٥ أشخاص ليك.. فى أخر سنه وأتنين على فين ودوك؟
قارن ده بقي بباقي اللي فى سنك فى المجموعات الأخري وشوف على فين راحوا.
وهنا مش بتكلم على تطوير وظيفي تحديداً ده ليه حسبه تانيه.. أنا بتكلم على تطويرك الشخصي اللي لازم يحصلك علشان ترتقي للمستوى التالي فى حياتك.
أقف مع نفسك وأسألها.
هو أنا وأصدقائي دول كل ما بنقعد بنتكلم فى أيه؟
قعدتنا بتدور حوالين أية؟ هل بدخل القعده دي اني عندي حاجه معينه وعايز أخد منهم يعني Validation يأكدوهالي علشان اتأكد اني صح ووقت ما أغرق أقول الله.. ده عماد مأكدلي!
طيب من وقت ما عرفتهم أنا فكرياً كبرت وهما كبروا وكنا أضافه على بعض واللا مجرد عمرنا بيتسرق منا فى موضوعات لا بنكسب بيها دنيا ولا أخره!
المصيبة بقي.. ليكون اللي حواليك دول هما اللي بيخسروك دنيا وأخره!
وقفة مع نفسك كدا.. وأسألها واحد من أهم الأسئلة اللي فى حياتك
الدائرة دي.. بتساعدني أنتقل للمستوي التالي فى حياتي؟ واللا بتشدني لورا؟
انا شخصياً لو الدائرة دي هتفضل موقفنا فى مكاني هسيبها لأن اللي واقف فى مكانه بيرجع لورا.. فما بالك أنها كمان تكون بتشدني لتحت!!
فكر كدا.. وشوف الوضع ده كمان ٥ سنين هيوديك على فين وقرر.. والقرار قرارك.. بس خليك فاكر.
اللي بيتسرق منك ده عمرك.
وده لا ينفع لما تتغني تشتريه من حد.. ولا ينفع حد يبيعهولك بمال قارون.
والقرار قرارك!
Post Original Date: June 13, 2021
FB Post's Link:https://www.facebook.com/daghash.eslam/posts/10220195193890488
Photo Source: https://pixabay.com/
Photo Source: https://pixabay.com/
No comments:
Post a Comment