القسوة!

الشيخ فى صلاة الجمعة النهاردة كان بيتكلم عن أن فيه ناس شغلانتها الوحيدة فى الحياة هيا القسوة!

وقال:

فيه ناس شغلتها الوحيدة فى الحياة هيا القسوة.. والمشكلة أنهم مش مكفيهم قسوتهم هما على عباد الله.. بل بيؤمروهم ويعلموهم يقسوا هما كمان على خلق الله.

أنتي أزاي ضعيفه كدا وملكيش شخصية.. فتروح تقسي على اللي من نصيبة القسوة دي يكون خطيب يكون زوج يكون زي ما يكون.

أنت أزاي مدير ضعيف كدا.. فيروح يقسي على موظفينه فيروحوا ياخدوا هما القسوة دي ويطلعوها على زوجاتهم فتاخد زوجاتهم ده وتروح تطلعه على أطفالهم لحد ما نوصل لمجتمع مليان قسوة!

يلاقوا حد متخاصم مع حد.. فيروحوا يشيطنوا فيه ويفضلوا يقسوا فيهم على بعض ونسيوا أن أصلاح ذات البين ده من أفضل الأعمال ديناً ودنيا.

أختلف مع جاره يبقي يتعمد يكره كل العمارة فيه.. فيغتابه ويكذب ويفتري عليه ويقول فيه ما ليس فيه علشان مينفعش تحبوا جاري اللي أنا مبحبهوش فيعلمهم القسوة فيقسوا ويتبني جبل قسوة ذنوب على كتافه.

دول ملهمش غير القسوة.. ميعرفوش غيرها ودي شغلتهم الوحيده فى الحياة.

ثم قرأ:

"وليحملن أثقالهم وأثقالاً مع أثقالهم وليسألن يوم القيامة عما كانوا يفترون"

Post Original Date:  July 16, 2021
FB Post's Link: https://www.facebook.com/daghash.eslam/posts/10220393861577056
Photo Source: https://pixabay.com/