الشخص اللي الصبح مع مجموعة متدينين وبالليل مع مجموعة ما بيسهروا سهرة معينة.. وشوية مع رأي الجمع فيحب مع حبهم ويكره مع كرههم ويعاشر مع عشرتهم ويفارق مع فراقهم.. دي علامة كبيرة جداً على عدم السواء النفسي ووجود إشكالية نفسيه حقيقيه عنده محتاجه دعبسه حقيقية جوا شخصيتة لحد ما يتعرف فين المشكلة.
الممثلة اللي بتهاجموها أنها شوية تتحجب وتنضم لجماعة وشوية تقلع الحجاب وترجع التمثيل تاني دي مش زي ما أنتم شايفينها.. دي بتحاول.. وبتدور على نفسها.. ولسه ملقتهاش!
بالمناسبة.. شخصيتها الحالية هيا مش شخصيتها.. هيا دلوقتي مش بشخصيتها القديمة.. ولسه مرحتش لشخصيتها اللي هتستقر عليها.. هيا حالية بتدور وبتحاول وطول ما هيا بتدور ميتقلقش عليها بس الخوف على اللي بيدور دائماً مش عليه ولا منه بل من اللي حواليه! .. أول ما الشخص ده هيوصل فدي غالباً غالباً غالباً شخصيتها الجديدة.
وأه بالمناسبة... أنا من البداية كان رأي واضح فى أمرها هيا ملبستش النقاب علشان النقاب.. ده فعل EXTREME عندنا.. وكل Extreme فهو غير صحي ولو طال فهو مرضي ولما كنت لسه طالب وأتسألت عن رأي فى موضوعها قلت أنها بتهرب من الناس بأي حاجز تبنيه بينها وبينهم.. الحاجز ده ممكن يكون أنعزاليه، ممكن يكون بعد عن البشر، ممكن يكون النقاب اللي بتلبسه علشان تتعامل مع الناس من وراه كنوع من الهروب... أو أو.
وأنا لسه عند رأي.. هيا تايهه.. بتدور.. بتحاول.. بس لسه موصلتش.
فرجاءً.. لها ولأمثالها.. يا تقولولهم كلمه تبنيهم.. يا متقولوش كلمة تهدهم.. علشان هما مش مبنيين أصلاً بل كل شخص فيهم لسه مجمعش شتات نفسه!
يا تقولوا كلمة تبني..
يا متقولوش كلمة تهد.....
Post Original Date: July 15, 2021
FB Post's Link: https://www.facebook.com/daghash.eslam/posts/10220388953854366
Photo Source: https://pixabay.com/
No comments:
Post a Comment