Mercy!

 سنة ٢٠١١ كنت قاعد مع رجل أعمال من أشهر الناس فى أسكندرية.. قلتله أنا بحسد حضرتك على الخير اللي بتعمله.

فرد وقالي: " أنا حصلي موقف كذا.. خسرت فلوسي كلها.. والله يا أبني أنا ما كنت لاقي أكل أنا ومراتي.. ومقولتش لحد ومعرفتش حد.. إلا بس الحلاق اللي كان فى وشي.. الحلاق ده بقي كان بيجي يحطلي ظرف فلوس كل فترة وأنا مش عارف مين اللي بيعمل ده.. لحد ما أفتكرت أن هو اللي بيعمل كدا علشان عارف الموضوع.. ومرت الأيام ووقفت على رجلي تاني ولما ربنا كرمني والله يا أبني عملت ليه محل بحوالي مليون جنية.. ومن يومها وأنا مبقاش بيعدي عليا يوم مبعملش فيه خير"

الكلمة دي ما فرقني من يوميها.. مبقاش بيعدي عليا يوم مبعملش فيه خير.. ومن وقتها.. وأنا نويت النيه دي لله... مفيش يوم هيعدي عليا مش هعمل فيه خير.

بيحكي أنيس منصور حكايته عن ست أتبنته وقت الثانوي علشان عائلته مكنتش قادره تصرف عليه وقتها (فى الكومنتات جزء من تعليقه على قصته).

والأمثلة كثيرة..

لما صديق ليا عمل عملية لوالد حد وكان واعده يردله الفلوس دي بعدها وأبن المريض قاله ملكش عندي فلوس.. جه وبيقولي أنا عملت وسويت معاه وده يبقي جزاتي فكان ردي.

سبحان الله.. مش يمكن يكون ربنا بعتك كسبب علشان تعمل العملية للراجل ده علشان تساعده يعيش فايق أكتر كام سنة لحد ما الأخوات الصغيرين دول يقفوا على حيلهم لأنه أخوهم الكبير الظالم ده لو أبوهم مات أو أو كان وارد يظلمهم أكتر من ظلمه ليك بأنه أكل عليك حقك؟

الخير اللي بتعمله.. والرحمة اللي بتتعمدها حتى وقت غضبك.. والأحسان اللي بتقدمه حتي وقت الأساءة.. والزرع اللي بتزرعه ومتنتظرش حصاده.. وربي.. وربي.. وربي.. ما بيضيع لأن مفيش حاجه عند ربنا بتروح.. بس وارد فعلاً لولا الفعل ده والتوقيت ده والموقف ده مكنش فلان بقي كدا.

لولا خسارة رجل الأعمال ده.. فيتعمل معاه كدا من الحلاق.. وارد مكنش لما يقف على رجليه تاني ياخد عهد طول ما انا عايش مفيش يوم هيعدي عليا ومعملش خير.

لولا الست اللي تبنت أنيس منصور .. وارد مكنش عرف يكمل تعليمه.

وعلى هذا المنوال فقس.

ليه بكتب ده؟ لأن من أول ما أتقالي فى جلسة النهاردة "الرحمة اللي حضرتك عملتها معايا فى تكلفة الجلسات أنا عملتها مع حد جالي فى شغلي وقالي ظروفي كذا.. أفتكرت حضرتك فعملت معاه بالظبط اللي عملته معايا" ووالله.. من وقتها ما ناسي الجملة دي لأنها حقيقي أعظم حاجه حصلتلي فى يومي.. وكأنها رسالة بأنه لأ كمل.. كمل لأن المجتمع اللي فيه ناس بتتنافس على التراحم فى بعض.. عكس تماماً الغابة اللي بيتعاش فيها مين يلهش أكبر قطمه من التاني ومين ياخد أكبر منفعة مادية من التاني ومين ومين.

من ١٤٠٠ سنة.. الرسول قالها فى حديثه.. الخير في وفي أمتي إلى يوم الدين.

مبيضيعش.. وكله هيترد.. والله ما بيضيع ولا هيضيع فحاول يكون ليك على الأرض سُنه حسنه تتبع من بعدك.. لأنك وارد تروح للمولي وتفضل الحسنة دي شغاله كصدقة جارية.......

ويا بختك وقتها..

Post Original Date:  July 8, 2021
FB Post's Link: https://www.facebook.com/daghash.eslam/posts/10220348809970794
Photo Source: https://pixabay.com/