HELP!

 من فترة جالي سؤال بيتكرر كتير جداً... وهو>> لو فلان (موظف عندي، زوجي، صديقي) عنده مشكلة ما ومش عايز يتغير أعمل معاه أية؟

والحقيقة أنا حابب أجاوب السؤال ده هنا مرة واحدة بعد أستئذان جميع اللي بعتولي نفس السؤال طبعاً.

بسم الله!

فى بحث تحدث عنه عالم النفس الشهير مايكل نينن أتعمل سنة 2012 كلمنا عنه فى ال Cognitive Behavioral Coaching وقالنا أن 100% من النتيجة النهائية اللي هنشوفها مع العميل بعد أنتهاء كامل الجلسات بتتوزع كالأتي:

40% >> مدي أستعداد ورغبة العميل على التغيير ده.

30% >> العلاقة نفسها مع القائم على تقديم المساعدة.

15% >> توقعات العميل من نجاح ال Journey اللي ماشيها دي.

15% >> المدرسة التطويرية أو العلاجية المستخدمة مع العميل.

فى أخر البحث ... أتقال نصاً:

"These four factors Furnham observes apply (roughly) equally to all forms of:

- Counselling

- Therapy

- Coaching

- Or whatever the help called"

يعني الأرقام دي وهي نابعة من دراسة أكاديمية بتقول لو بس العميل ده مش عايز يتغير ومش حابب مثلاً القائم على تقديم الخدمة (يكون من يكون كوتش، مرشد، معالج، طبيب نفسي.. أو أو) ومعندهوش توقعات جيدة ولا أمل بالتغير بعد أنتهاء جلساته مع المختص.. دول وارد يفقدوا نسبة 85% من نجاح المخرجات المتوقعة بعد الأنتهاء الجلسات دي!

طيب... لما ده بيتقال للمختصين؟ أومال غير المختصين يعملوا أية؟

هقولك..

فى إدارة الأزمات... أول وأهم مبدء أتعلمناه كان وقت وقوع الكارثة والأزمه أعمل حاجتين:: أنجو بنفسك أولاً .... ثم أصرخ بصوت عالي جداً HEEEEEEEEEEEELP .. يعني أية ده برضوا؟

الموقف اللي هحكيه ده حقيقي ووقع مع بعض الجيران اللي أعرفهم شخصياً.. شخص مسكت فيه الكهرباء.. فواحد شافه فضل يصرخ لحد ما الناس أتلمت وفيهم واحد طلع يجري يطلب الأسعاف والتاني جاب خشبه كبيرة جداً وفضل يضرب فى الشخص علشان يفصل الكهرباء عنه. لو كان لمس الشخص كان هو أخد الكهرباء مكانه.. فهذا الشخص البسيط.. عمل اللي الكتاب قاله: نجا بنفسه أولاً وملعبش دور المنقذ، ثم قال HEEEEEEEELP فكل واحد من الحضور كان ليه دور.

فلو عندنا شخص مبيتغيرش فعلاً وأنت بتحاول معاه كتير يتغير... يبقى أول حاجة تتوقف عن لعب دور المنقذ بدل ما تغرق معاه ومتلاقيش اللي ينقذك، وبدل ما هو يدخل فى حالة من المقاومة والعند والأصرار على عدم التغيير. وبعدها تطلب المساعدة من مختص.

ولما يروح لمختص النسب موجودة فوق أهيه.. المختص أمام الله هيعمل اللي عليه.. وكل الأحتمالات وارده.. وارد ميحبش مختص ويحب الأخر، وارد ميحبش مدرسة ويحب التانية.. وارد ميحبش أي حاجة اللي هو حرفياً عميل قبل كدا رجعلي علشان اللي محوله عليه غرفة الجلسات ريحتها سجاير وهو مبيحبش السجاير فمش هروح ليه تاني وبعد أذن حضرتك حولني على حد تاني (هكذا نصاً قال).

فى نقاط:

- مفيش مدرسة علاجية أو تطويرية على وجة الأرض قادرة على تغير شخص 100% هو غير راغب وغير مستعد فى المساعدة.

- أقصي حاجة هيقدمها المختص.. هيا محاولة لمساعدة الشخص يساعد نفسه.

- محدش بيعرف يغير حد مش عايز يتغير.. سيدنا نوح مقدرش يغير أبنه، سيدنا لوط مقدرش يغير مجرد قناعة عند زوجته، سيدنا محمد مقدرش يغير عمه... فأحنا (مختصين وغير مختصين) مين بقي جنب الأنبياء علشان نغير حد مش عايز يتغير؟

- ولمتبعي نهج وموضة قطع العلاقات فياريت نقرأ الكلمتين الجايين دول بعناية فائقة:

لو الشخص وافق .. وراح لمختص.. والمختص قدر يلمس تغير بيحصل

مهماً كان صغير والتغيير هنا فى الأمور النفسية بشتا أنواعها وأشكلها يٌقاس بميزان الدهب.. فلو شاف تغير بيحصل وأشاد إليه دي أحد العلامات اللي الكتاب قال فيها هنا مينفعش نقطع علاقة مع الشخص ده وننتظر لحد ما نشوف نتيجة التغير اللي هيحصل هيودينا لفين وهل هيساعدنا للأرتقاء للمستوي التالي واللا لأ وبعدها نحسب حسابتنا من أول وجديد.

هذا ما أعلم حتى أخر تحديثات درستها وقرأتها فى 2021.

والله أعلم.

Post Original Date:  June 28, 2021
FB Post's Link: https://www.facebook.com/daghash.eslam/posts/10220298796280483
Photo Source: https://pixabay.com/