"كنت أريد أباً عقلياً.. ووجدته"!

 بمحض الصدفة قرأت اليوم جملة ل أنيس منصور بتقول "كنت أريد أباً عقلياً.. ووجدته" رحت أدعبس وأنا مذبهل!!! أنيس منصور بيقول كنت أريد أباً عقلياً ووجدته!! أنيس منصور!! ده بيتكلم عن مين ده!

فكتشفت أنه بيتكلم على العقاد.

ثم قرأت له بيقول: "عندما أنتقلت من المنصورة الى القاهرة أنتقلت إلى جامعتين فى وقت واحد.. جامعة القاهرة وجامعة العقاد. وكانت جامعة العقاد أقرب وأعمق وأعظم"

أقرب وأعمق وأعظم!! من جامعة القاهرة!!

وفى موضع أخر قال "كانت لي افكار صغيرة غامضة.. وكان العقاد هو المصباح الذي هداني. كان صاحب عقل كبير وكنت صاحب قلب صغير"

فقد أية صدق أنيس منصور لما قال "كنت أريد أباً عقلياً ووجدته" لأن كل شخص محتاج يكون ليه كبير.. كبير بيرجعله مُعلم، أستاذ، موجه، أياً كان مسماه.. بس يلاقي فيه ويلاقي عنده تحقيق الجملة دي.

بس الأول يكون هو عايز: كنت أريد أباً عقلياً...

وبعدها.. وبعد ما يدور عليه ويلاقيه يقدر يحتفل ويقول "ووجدته"

لسه أمبارح بيقولي المنتور بتاعي (ده الأب الروحي بتاعي فى الحياة وحد ملهوش علاقة بالكوتشنج ولا أي حاجه فى مجالي) لما كنت بقوله أهه ال ٣ ٤ ساعات اللي قعدناهم النهاردة فى نقاش وثراء فكري بهذا القدر من العمق الواحد بيعيش عليهم والله اسابيع وشهور مبيعرفش يتكلم مع حد بهذا القدر من العمق ويخرج من كل حديث يا متعلم حاجه جديده يا مغير وجهه نظره عن حاجه يا رايح يذاكر أو يقرأ حاجه جديده بس الأجمل أني مع كل قعده بتعلم منك أكتر الحياه نفسها بخبراتها اللي مبلاقيهاش فى كتب.

سكت..

ورد بجملة "كل واحد بيدور على اللي زيه يا إسلام.. المُفكر بيدور على المفكر، واللي عايز يعيش فى عقلية الضحية هيدور على اللي يصدقه ويصدق كلامه ويثبتله أنه ضحيه.. واللي عايز يدور على اللي هيكبر معاه هيدور ويلاقيه فى صالون ثقافي.. فى قعده علم.. فى كذا فى كذا.. شوف مين المقربين من الشخص تعرفه" وبمحض الصدفة الاقي أن أنيس منصور بيقول أنه كان بيروح كل أسبوع يقعد بالساعات والساعات كل يوم خميس يتتلمذ على ايد العقاد ومش بس كدا بل أن كان هو وأصدقائه بيتجمعوا قبلها علشان يرجعوا هو علمهم أية الأسبوع اللي قبله.. ويروحوا يحضروا.. ثم يقعدوا تاني يتعلموا من بعض هما طلعوا بأية!

واقف كتير قدام الكلمة دي "كنت أريد أباً عقلياً.. ووجدته" وبحس أن شباب كتير محتاجين الوصف ده.. وبحس أن من نعمه ربنا أن ده شيء يتاخد من أي حد.. مش شرط من أب فعلي ورحمه ربنا بالنسبة ليا هنا فى أن أي واحد ملاقاش ده فى والده أو عائلته فالدنيا والله موقفتش على ده.. بس فيه شباب كتير أوي هيا اللي بتوقفها!! وبيصل الحال ببعضهم أنه عايز يروح يحاسب ابوه هو انت مطلعتنيش زي فلان ليه؟ هو انت معلمتنيش زي ما ابو فلان علمه ليه؟ بس الحقيقة المره.. أن غالبية الأباء والأمهات علمونا وربونا باللي يعرفوه.. يبقي يتقال ليهم شكراً أنكم قدمتم اللي قدرتم عليه لحد كدا ودوري هو اللي جاي ونخرج بقي شوية الله يكرمكم من دور المفعول به اللي مبينتهيش ده!!!! وزي ما روبرت كويساكي لقي الأب الغني اللي علمه واللي حكي عنه بالتفصيل فى كتاب الأب الفقير الأب الغني وزي ما أنيس منصور لقي العقاد وقعد تحت رجليه يتعلم منه وقال فيه "كنت أريد أباً عقلياً.. ووجدته" وزي ما غالبية العلماء والمفكرين هتلاقي ليهم بدل الاستاذ ١٠ وبدل المرجعية ١٠٠ ..أعتقد أن لسه ليك دور.. لو والدك مقدرش يملء الدور ده لأي سبب كان... فمعتقدش أنك توقف حياتك على أنك كنت ضحية تربية وتنشأة وظروف.. بس تقدر تخرج من دور المفعول به للفاعل.. وتدور على الشخص ذو الثراء الفكري اللي تديله المكانه دي.

أتمني أكون عرفت أوصل اللي فى البوست كويس.. بس لو موصلش كويس.. ولو هختصره فكل اللي أقدر أقولهولك أني مؤمن أننا كبشريين لله الحمد والشكر لأخر نفس فى عمرنا رب العباد عاطينا حريه الأختيار فلو مكنش عندك المرجعية الفكرية بالثقل اللي محتاجه.. فالكون كله خيارات.. تتعلم من مين.. أية.. أمتي.. ده أختيارك.. زي ما كدا كان مختار من بدري اوي أنيس منصور يدور على أب فكري فلما لقاه قال فيه: كنت أريد أباً عقلياً.. ووجدته!

لو معندكش الأب العقلي ده فأعتقد أنه وارد تكون محتاج تدور عليه ووارد جداً أن وجوده يكون أكبر مساعد ليك فى انتقالك للمستوي التالي فى حياتك

Post Original Date:  March 28, 2021
FB Post's Link: https://www.facebook.com/daghash.eslam/posts/10219668538804440 Photo Source: https://pixabay.com/