التقبل ثم التقبل ثم التقبل!

 حر فى نفسك فيا أنا لأااااااااااا.. أنا إنسانة وليا الحق.... أني أعيش العمر سعيدة.

أنت زعلت؟

طب خليني أعيشلي يومين..... مش لازم عمر!

وأنت بتقرأ السطور اللي فاتت غالباً تصورت أن دول كلمتين من شخص بيلوم شخص أخر.. بس الحقيقة.. أن الأمر أصعب من كدا بشوية.

للآسف الكلمتين دول لشخص موجه اللوم والنقد بل والصراخ داخلياً وليس خارجياً.. فى وقت من أصعب الأوقات اللي بيمر بيها البشر على مدار حياتهم.. وقت الصراع الداخلي Internal Conflict.

تعالي نشوف الوصف اللي وصفته الكلمات الرائعة لأغنية أصالة مبقاش سر واللي بتمني منك تقرأ كلماتها على مهل شـــــديــــــد

"مبقاش سر .. أختياراتي تمللى تندم .. و ما بوصلش لحاجة تسُر مبقاش سر.

كل ما أحاول يوم أتقدم .. برجع تانى محلك سر"

"قلبى تاعبنى بحكم العادة والأيام عمالة تمر"

دايما يشرب قهوته سادة ويرجع يشكى الطعم المر"

"دايما يختار سكة وجعى و يجرى عليها و يخلينى حكاية الناس تفضل تحكيها

و أما اقوله يا قلبى أرحمنى..... يقوللى انا حــــــــــــر"

"لأأأأأأأأأأأأأأأأأأأأأأأأأأأأأأ..

حر فى نفسك فيا أنا لأاااااااااااااااااا

أنا أنسانة و ليا الحق أنى اعيش العمر سعيدة"

"انت زعلت؟؟؟؟

طب خلينى أعيشلى يومين ...........مش لازم عمر"

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

طبعاً كلمات كلها معاناه، توهان، حيره، صراخ، وجع!

عارف الخناقة أياها اللي بتبقي جوانا بتاعة:

- قدامي وظيفتين واحدة فيها شغفي Passion بس مفيهاش فلوس... والتانية فيها فلوس ومستقبل بس بعيده كل البعد عن ال Passion بتاعي .. أختار أية؟

- متقدملي 2.. زميلي الطموح المحترم الخلوق واللي بيحبي جداً.. وواحد تاني غني جداً بس معرفهوش.. المشكلة أن أهلي حابين التاني لأنة فلوسة حقيقي توزني دهب ..عقلي بيقولي خدي الراجل الغني.. وقلبي بيقولي بلاش، أنا مش سلعة تتباع للي معاه أكتر!

الأنسان اللي بيكون واقف فى منطقة اللاقرار.. منطقة وجود رغبات، أهداف، أحلام، وحاجات كتير متعارضة!

مليون سؤال وسؤال فى الوقت ده بيجي للواحد مننا.. بيبقى الشخص زي الغريق اللي متعلق بقشايه وفى نفس الوقت.. ممكن القشاية البسيطة دي اللي تيجي فى صورة نقد أو فعل أو خبر تكون كالقشة التي قسمت ظهر البعير!

ويفضل الأنسان تااااايه!

شوية يحسبها بالعقل، وشوية يحسبها بالعاطفة!

شوية خايف من بكرا، وشوية أمل رهيب فى اللي جاي!

شوية عنده ثقة فى نفسة، وشوية تنهار الثقة ولا واعياً يبدء يعمل لنفسة Risk Maximization & Resources Minimization

مليون سؤال فى الوقت ده.. لصراع نفسه ينهيه.

فيجري على اللي منه، الحد اللي مفكر أنة قريب وهيساعد وهيدعم.. فيلاقي اللي يزود البله طين!

الأهل ولومهم ونقدهم!

أتذكر اول ما بدءت فى شغلي فى الCoaching بعت رسالة لأستاذي أسأل أزاي بنتعامل مع الأهل اللي كل ما البنت بنتهم تبدء تخرج من اللي هيا فيه يرجعوها ليه تاني!

بنوصل فى الجلسات لحلول فتجرب وتجيب نتيجة.. يستهزئوا باللي بتعمله ويكرهوها فيه وتتهد تاني!

كل ما تاخد قرار يلغوه، كل ما تحاول يسمعوها كلام ييأسها.

وعلشان كدا كتبت الكلمتين دول للآهل.. ازاي يتعاملوا مع أبنائهم وقت ما يشوفوهم فى صراع داخلي (وخاااااااااصة الصراع الداخلي اللي جاي بعد فترة أن البنت خلاص أتطلقت رسمياً فصراع هو انا كنت غلطانة واللا لأ و و و)

اللي حضراتكم مفترض تعملوه:

*التقبل التقبل التقبل.

مهم جداً تفهم الأسرة والأصدقاء والمحيطين وتقديم المساندة الأجتماعية فى الوقت ده.

تقبل الانفعالات الحادة.. الصراخ.. وحتي التصرفات الغير معقولة.

تقبل أن الأنسان ده ممكن يحيرك معاه... لأنة هو نفسة محتار!

____

فية شوية حاجات ممنوع منعاً باتاً أنك تعملها مع حد فى مرحلة صراع داخلي ومنها:

أنك تقولة كلام زي أنسي!

التجاهل أو التهرب من أسئلته وتركها بلا أجابة!

والأصعب.. واللي حقيقي بيوصله لمرحلة الأنهيار أن تحول الموضوع لشجار عائلي وتوجيه اللوم ليه .. كلمات زي "ما أنتي السبب، مش ده اللي فضلتيه على كل اللي أتقدمولك، مش ده أختيارك.. و ووو " دي حقيقي قادرة تزيد المعاناة عشرات أضعافها.

تقبل الأهل.. أستماعهم بأخلاص.. مساعدة أبنائهم للجوء لمختص.. أحترام مساحتهم الشخصية.. مساندتهم فى تنفيذ قرارتهم المدروسة..... دول البداية!

Post Original Date:  Oct. 3, 2019
FB Post's Link: https://www.facebook.com/daghash.eslam/posts/10215391087510831 Photo Source: https://pixabay.com/