أوعي تتنازل عن حلمك، أياك تستسلم، مينفعش تبكي سيبت أية للبنات يا راجل، أنتي قوية حبيبتي ومفيش حاجة تأثر فيكي أية يعني جوازه فشلت؟ .. دي جمل من اللي تقع تحت تصنيف الToxic Positivity بنقولها وأحنا مفكرين أننا بنساعد، بس الحقيقة بنكون وقتها بنهد مش بنبي!
تخيل القصة دي كدا معايا:
بنت 22 سنة لسة خارجة من واحدة من أصعب التجارب البشرية.. الطلاق .. سنتين بتحاول تعالج المشكلة جربت 99 حل من ضمنهم حكماً من أهله وحكماً من أهلها وكذلك اللجوء لمختص كل الحلول منفعتش وكان الحل رقم 100 هو الطلاق.. للآسف!
أنفصلت، رجعت بيت أهلها.. وفجأة وهي قاعدة مر شريط الذكريات... أيام الخطوبة.. أمالهم وطموحاتهم.. أحلامهم.. حُبه ووفائه ليها.. وحياتهم اللي أنقلبت بعد ما دخلت حياتهم السكرتيرة بتاعتة.. وفجأة دخلت فى هيستريا بكاء!
تشوفها والدتها/ صاحبتها فتقولها لأأأأأأأأأأأ ..أنتي قوية، أوعي تبكي على شخص ولا يسوي ..بكرا أجوزك سيد سيدة.
اللي حصل فى المثال ده واحد من أبسط وأيسر أمثلة الإيجابية المٌسممة.
أحنا مقدمناش وقتها أي حل ولا أي نوع من أنواع الدعم لصاحب المشكلة!!!!!
أقولك ع الأصعب.. وارد جداً أننا ممكن نكون زودنا أستياء صاحبة المشكلة ووصلناها لحديث داخلي بدء بـــ "أنا ولا قوية ولا نيلة، أنا منهارة وفى أسوء حالاتي وتايهه ومتخبطة وعندي 100 فكرة وعكسها ووقفة فى منتصف طريق وحقيق مش عارفة أعمل أية"
قارن بقي الرد اللي فوق ده بالرد الجاي:
"حبيبتي... أنا حقيقي متفهمة ومقدره تجربتك، عارفة أنها تجربة صعبة، مش هقدر أقولك أني حاسة بيكي.. لأن محدش يعرف يستشعر مشاعر حد تاني.. أبكي لو ده هيريحك.. أتكلمي لو ده هيخرك اللي جواكي.. خدي وقتك فى كل خطوة.. بس المهم.. نكون بنتحرك من خطوة لخطوة أصح.. أبكي، أتوجعي، أخرجي، أقعدي لوحدك، أعملي اللي يناسبك بس اللي يهمني بعد كل ده.. اللي جاي.. أنك تبقى جاهزة بعد شوية وقت نقعد ونتكلم ونخطط لحياتك الجاية وشكلها هيكون أية.. أحنا جانبك وقت ما أحتاجتي وفى ضهرك بكل اللي نقدر عليه "
وقت ما بيكون عندنا مشكلة مشابهه ليس من الإيجابية بشيء أننا نطالب الشخص بتزييف مشاعرة علشان يرضينا، ولا أننا نوهمة أنة مفيش مشكلة فى حين فية مشكلة، أحنا بنساعد الشخص بالأعتراف بوجود المشكلة، بنتقبلها، بنشوف أفضل وسيلة نقدر نساعد بيها الشخص إية وأزاي واللي ممكن تكون أبسطهم أننا نوجهه لمختص لو مش قادرين نساعد.
أننا نقولة متحزنش، ومتبكيش، ونساعدة على كبت المشاعر وتزيفها وأنة يبين أنة كويس وهو مش كويس.. زي بالظبط واحد لسة عامل عملية رباط صليبي أمبارح بنطلب منة ينزل يجري تراك الملعب لأن الرياضة مفيدة.. أه هيجي دور الرياضة، بس بعد العملية بيكون دور العلاج الطبيعي وبعدها نمارس الرياضة.. أستعجال خطوة واحدة فقط قادر يدمر كل خطة العلاج.
Post Original Date: Oct. 24, 2019
FB Post's Link: https://www.facebook.com/daghash.eslam/posts/10215568539187012
Photo Source: https://pixabay.com/
No comments:
Post a Comment