عادي جداً أنك تترفض من أنترفيو، أنك تقعد شوية وقت من غير شغل، أنك متنجحش فى مادة، انك تدخل شركة ومتنجحش فيها، أنك تتقدم لواحده أعجبت بيها وتترفض، أنك تدخلي فى قصة حب ومتكملش، أنك تحط خطة ومتنجحش، أنك تعمل بيزنس وأنت أخد كل تدابيرك وخططك واستخرت واستشرت ومينجحش، أنك علشان تتعلم لغة تقعد ١٠ اضعاف وقت زميلك، أنك تقع فى مشكلة وتلاقي اللي كنت مفكر هيكونوا اول ناس يقوموك زي ما كنت أنت ليهم الضهر والسند.. متلقيهمش، أنك تكون طبيب وتمرض بمرض بقالك ٢٠ سنة بتعالجة، أو أو!
عادي جداً يا صديق.
والله أكثر من عادي!
على مر العصور.. التاريخ ورالنا عظماء سقطوا.. ملوك اتاخد منهم ملكهم.. رجال أعمال ضاعت كل فلوسهم.. وقصص لا تنتهي!!
وهنا حابب أذكر نفسي بجملة بحب اقولها دائماً لنفسي.. "طاقة التأقلم والوقع فى منطقة الراحة إيسر على النفس من المقاومة.. لكنها خيار الضعفاء"
شوية مشاعر حزن جم.. أهلاً بيهم.. أنت بشر.. بس مش اهلاً بيهم أبداً لو طولوا.
منجحتش فى حاجه معينه.. شوية وقت حزن عليها .. ومن ثم نقوم نخطط للمحاولة التالية.. لكن منصفش نفسنا بالفشل أو ناخد قرار بعدم المحاولة.
يوم عدي عليك باظ فيه جدولك.. ولا يهمك!! .. أستمتع بيه.. بس فى اخر اليوم شوف هتوزع مهام اليوم ده ازاي على اليومين الجايين.
بشكل دائم يا صديق.. تعود أن لا تتعود على عادة.
بشكل دائم يا صديق.. تقبل الهزيمة.. تقبل تجرع مرارتها.. وقسوة مشاعرها.
لكن..
لكن..
لكن..
بعد أستراحة المحارب.. خد خطوة.. لأن المحارب لو كمل فى راحته دي.. فكدا لا بقي أسمه محارب.. ولا بقي أسمها أستراحة.
كمل.. والكون كله داعم ليك.. حتي لو أنت شفت عكس ده.. ان شاء الله كل أمورك ميسره.. كمل وربنا معاك
FB Post's Link: https://www.facebook.com/daghash.eslam/posts/10214152966038568
Photo Source: https://pixabay.com/
Photo Source: https://pixabay.com/
No comments:
Post a Comment