الاحتياج الدائم!

 الأسئلة الأستخباراتية وتحقيقك الدائم صبح وليل مع البنت ده مش مكسب.. ده أسهل الطرق لخسارتها!!!

البنت بتتكسب ب٣ حاجات انا شخصياً مكنتش أعرف أنهم بالقدر ده من الأهمية الأ بعد ما أشتغلت فى الكوتشنج وغالبية الجلسات بتدور نحو ال٣ حاجات دول! ثقة، تواصل فعال مستمر، أمان نفسي.

ده يحصل مع أي بنت.. بنتك اللي عندها ٣ سنين، أو بنتك المراهقه، أو زوجتك، أو أختك.. أو والدتك.. أو تلميذتك أو مديرتك حتي!

أياً كان العمر والحالة الأجتماعية للبنت!

البنت تحتاج ال ٣ حاجات دول:

١- ثقة:

أنها تشعر بأنها موضع ثقة من خلالك أولاً ومن ثم بعد مواقف تتبادل هيا الثقة دي معاك لتصبح ثقة متبادلة.

٢- قناة أتصال متاحة تقدر من خلالها توصلك وتتكلم وقت ما تحتاج لده (وبالمناسبة لو حضرتك فى شغلك مثلاً مينفعش ترد على تليفونات تقدر تعرفها ده وتعرفها وقتك المتاح وهيا بعد شوية وقت هتحترم ده، بس مش هتحترم أبداً انها تتصل ٣٠ مره بدون رد منك وتفضل كل يوم بالساعات فى قلق علشان حضرتك مبتردش).. تتكلم وتقول اللي محتاجه تقوله بدون ما تقعد تحسب للكلمه ١٠٠ حسبة.. يا تري هيفهما ازاي؟ يا تري هيزعل؟ يا تري يا تري!!

٣- مساحة جيدة من الأمان النفسي اللي تقدر تيجي لحضرتك فيها وتعترف ليك بأخطائها وتقصيرها ومخاوفها وأحتياجاتها وكل شيء وهيا متأكدة أنها لا هتصبح موضع للنقد (غير البناء) ولا للوم فتقدر تقولك مثلاً:

* للأسف.. نتيجتي ظهرت.. أسفه أني مكنتش عند توقعاتك.. النتيجة سيئة جداً.. مش هقولك الأمتحان جه وحش لأني متعودش على ده.. بس هقولك اني فعلاً مذكرتلهوش ومحضرتش ليه كويس.

* أحنا خلاص بنقفل البيزنس وخسرت كل فلوسي اللي حطتها فيه.. عارفه ان غلطتنا من البداية أننا معملناش دراسة جدوي صح ومشفناش السوق عايز أية واتسرعنا بالفكرة وتنفيذها ودي النتيجة.. أنا فى قمة حزني.. مش بس خسرت فلوسي.. بل كلنا كصحاب عملنا البيزنس ده خسرنا بعض بسببه!

الخلاصة:

ومش بس البنت والله! .. كل واحد مهماً كان عمره وجنسه وجنسيته ودينه وانتمائه ومعتقده وفكره وثقافته محتاج ده!

* محتاج أحس أني موضع ثقة منك وأشوف مواقف تؤكد ده، وأقدر أتأكد وقتها أن ثقتي ليك فى محلها.

* محتاج أكون متطمن (ونحط تحت دي ١٠٠ خط) أني وقت ما أحتاجك هلاقيك وهقدر أوصلك.

* والأهم والأصعب ... محتاج أجيلك وأجري عليك واترمي فى المساحة الأمنه اللي أنت خلقتهالي وأكلمك عن مخاوفي وعن مشاكلي وكل شيء وانا عارف اني حتي لو غلط هتقابلني وتحتضني وبعد ما اخلص كلام وشرح، حتي لو غلط هتعنفني وتقومني وهتفكر معايا كان دورنا اية ان الغلط ده يحصل، وازاي نمنع الغلط ده ميحصلش مره تانية فيتربط وجودك عندي بالأمان والثقة مش خوف وقلق!

Post Original Date:  May 31, 2019
FB Post's Link: https://www.facebook.com/daghash.eslam/posts/10214508652450506 Photo Source: https://pixabay.com/