كل واحد فينا أتعلم لغة فى بيت أهله وهو صغير.. اللي أتعلم لغة الحب، واللي اتعلم لغة الخوف، واللي اتعلم لغة الرفض، واللي اتعلم لغة الوحدة.. واللي أتعلم لغتين تلاتة من دول مع بعض وهو ونصيبة. كانوا سلبيين أو كانوا إيجابيين.. كانوا ييبنوا واللا كانوا بيهدموا.
من وسط كل اللغات دي كان لازم تاخد منهم لغة تبقي لغتك الأم تتعامل بيها فى وسطهم وتتأقلم معاهم فيها علشان تعدي ايامك حتي لو كنت رافض ده.
لغتك الأم دي كانت هيا المسيطرة بلا منازع فى طفولتك ومراهقتك وربما حتي فى شبابك وحياتك كلها لو متعملتش غيرها.
اللغة دي من وقت للتاني وارد تكون الضيف الذي لا مرحباً به.. مش هتسيبك.. وهتفضل فى حرب معاها وهتفضل فى حرب معاك.. هتفضل معاك حتي فى أحلامك.. زي بالظبط بالرغم من شطارتك فى الإنجليزية إلا أنك فى أحلامك وأنت نايم ٩٠% هتحلم بالعربي.
لغتك دي وارد جداً أنها تكون نطارتك اللي بتجبرك تحكم على كل شيء من خلالها.
اللغة دي هتتعامل بيها حتي دون وعي.. فلو أتعلمت لغة الأنعزلية مثلاً، وأصبحت لغتك الأم.. وسيطرت عليك.. فأدمانك للوحده والأنعزاليه فى السراء والضراء وارد جداً.
ولذلك.. وبناءً عليه.. أي تغير فى شخصك هياخد وقت.. تعليم لغة جديدة بتتكلمها هتاخد وقت.. أنك تتعلم أزاي تحب نفسك بعد ما خرجت من بيت كله صقيع أسري ومشفتش فيه أي حب بين أفراده لدرجة وصلتك كشاب أنك تقتنع أنه عيب تشكر فى مراتك قدام حد أو تطبطب عليها فى وسط وجود عيلتك أو عيلتها ده ميصحش لأنك يا مسكين شفت كل حاجه عكس ده!!! فعلشان تهدم كل ده وتتعلم لغة الحب والأحتواء وبث الطمأنينة فى النفس وفى الأخر ده هياخد وقت.
تعليمك وأتقانك للغة جديدة عليك هياخد وقت.
أنك تسيب لغة العصبية وتتعلم الثبات الأنفعالي هياخد وقت.
تتعلم الحب هياخد وقت.
تتعلم العطاء هياخد وقت.
تتعلم الطمأنينه هياخد وقت.
تتعلم السماح والعفو عند المقدره هياخد وقت.
فلو سمحت يا صديق.. رجاءً.. أسمح لنفسك أنك لما تروح تتعلم اللغة الجديدة دي على أيد مختص أنك تدي لنفسك الوقت الكافي أنك تتعلمها صح، ثم تبدء ممارستها فتصيب وتخطء، ثم يتصحح ليك خطأك وتتدرب لحد ما تقرب لأفضل درجة من إتقان اللغة دي..
وقتها.. رجاءً لما ده يحصل.. أحتفل بنفسك لأن حقيقي.. حقيقي.. وقتها هتكون قطعت شوط طويل أوي نفسك أتقطع فيه وغالباً قطعت نفسنا معاك كمختصين بس يالا فداك المهم نشوفك ونحتفل معاك بأستمتاعك بلغتك الجديدة.. لغة ربما يوماً ما تصبح ممارس ليها كلغتك الأم اللي مخترتهاش فى يوم من الأيام.
هتقدر.. وهتكمل للأخر
Post Original Date: Dec. 7, 2020
FB Post's Link: https://www.facebook.com/daghash.eslam/posts/10218860627247156
Photo Source: https://pixabay.com/ 
No comments:
Post a Comment