قلقان جداً من نهاية موجه الكراهية اللي بتتزرع من بعض البنات للبنات تجاه الشباب.. قلقان من التصميم المستمر أن العلاقة بين الأثنين ساحة حرب.. قلقان من بعض الرجالة اللي مقدمتش واجباتها وبعض الستات اللي مبقتش بتعرف تطالب غير بحقوقها علشان خايفه نهايتها تبقي زي بنت عمها اللي لما مطالبتش بحقوقها وكانت واقعه فى ايد راجل مقدمش واجباته كامله مخدتش حقها.. قلقان من كل واحده مره بتجربه سلبيه تاخدها تفضل تعممها وتفرضها على كل الشباب وأقسم بربي بشوف رجاله بتتحاسب على ذنب ناس تانية ما ليهم فيه ١٠% ذنب حتي!!! .. قلقان من النشر المبالغ فيه لكل تجربة سلبية والايجابي يتعاش ونعيش اللحظة الحلوة خروجات وفسح وضحك وهزار وسفر وكل جنس يستمتع بالأخر بس لو حصل شيء مش كويس ولو حتي مجرد خلاف بسيط ننقل حاله من الذعر والرعب للجنس الأخر.
اللي مبتشوفوهوش بقي على السوشيال ميديا.. أن جزء كبير من الشباب بقي خايف ياخد خطوة الارتباط أكتر من البنات نفسهم!! اه والله!! بشوف ده بعنيا.. شباب زي الورد وقلقان.. لسه حد بيقولي نصاً "حضرتك تعرف فلانه؟ شفت لما انفصلت عن زوجها طلعت كل سره ازاي؟ أنا أزاي ممكن ااتمن البنات وانا بشوف بنفسي أنها لو اختلفت مع صاحبتها اللي أمبارح بتشكر فيها والنهاردة اختلفت معاها تطلع بكرا تشتمها" وأخر "شايف كمية الشتيمه فى الرجالة؟ أنا بقيت قبل ما افكر اخد خطوة مع أي بنت ادخل اشوف بتكتب أية على الفيس بوك بتاعها عن الرجالة لاني هكون واحد منهم.. يعني بعد العمر ده كله هل من الحكمة والعقل اني اروح اخد حد شايفة ان نهايتنا محكمة الأسرة؟ طيب اروحلها ليه لما هيا نفسها توصل لمحكمة الأسرة.. أنا عايز واحده ابني بيت معاها بموده ورحمه مش بنديه وعند وراس براس"
عندي عشرات من ده.. وانا الحقيقة معرفش أخره ده أية!!! رايحين على فين؟ السوشيال ميديا اللي بقينا ننشر عليها السلبي علشان نخذي العين ومنجيبش سيرة الحلو لنتحسد دي هتودينا على فين!!
ونصيحة أخيره لوجه الله.. وكقول أقف بيه أمام الله.. فيه ناس كتير من مصلحتهم كره الطرف الأخر دون التطرق ل ليه بيعملوا كدا.. فنصيحتي ليك شاب أو بنت.. أي حد.. أي حد.. أي حد يكرهك فى الجنس الأخر وبالذات لو مختص هو اللي كل كتاباته عدائيه تجاه ذكر أو أنثي.. اياك ثم اياك أن تتبعه.. لأن نتيجة ده هتدفعها بأغلي الأثمان وهتندم وقت ما لا ينفع الندم.. وانا أول الناس دي.. لو سمحت... لو شفتي بكتب عن البنات بطريقة تكرهك فيهم اعملي Remove فوراً ولا تتبعني.. ولو شفتيني بكتب عن الرجاله بطريقة تخليكي تستمتعي بدور الضحية أو تدخلي فى حاله الصعبنه أو تكرهي الجنس الأخر لو سمحتي أعمليلي Remove فوراً.
أحنا رايحين على أذمه مجتمعيه بالشكل ده.. لو البنات قلقانه قيراط أقسم فجزء كبير من الشباب بقي قلقان من البنات عشرة أضعاف قلقهم.
كفايا خطابات كراهية..
كفايا نشر سلبيات بس..
كفايا توصيل للناس أن العلاقات ساحه حرب..
No comments:
Post a Comment