Red Flags!

 فى بداية العلاقة فية كام حاجة لو لقيتهم فدول يعتبروا بمثابة Red Flags بيقولولك من فضلك خلي بالك ومتلعبش دور المنقذ وخد خطوة لورا وأحياناً بيقولولك متكملش.. دي امثال بسيطة جداً على سبيل المثال لا الحصر:

١- كثرة الأختلاف وضعف وسوء التواصل بينكم: ودي علامة لو كملت بعدها فأنت المسئول عن أي شيء لاحقاً.. سوء وضعف التواصل علمياً وبلا منازع هو أعلي نسبة مسبب فى الطلاق.. فلما ده يبقي لسه حاصل على البر ويكملوا فده شيء يقلق.. وهنا مش بقول مجرد خلاف بسيط بيحصل كل فترة.. دي حاجه عادية جداً وصحية جداً.. بس لما يبقي كل مكالمة بخناقة وكل خروجه بعكننه فدي علاقة لا تبشر بخير من قريب أو بعيد.. عايز تفهم قصدي أكتر شوف دور دينا الشربيني فى فيلم كدبة كل يوم.. أنا حرفياً مكنتش قادر أكمل الفيلم من العكننه اللي مسبباها.. كتله غم ما شاء الله!

٢- الخيانة: وهنا بنتكلم عن خيانة واضحة مش مجرد شكوك وظنون.. تاااااني.. خيانه واااااااضحه.

٣- الدين: وهنا مش بنقول أنه علشان هيا بتصوم أتنين وخميس وال ٣ أيام القمرية كل شهر وهو لأ فده معناه انه مينفعش وحتي لو منفعش ليها فده خيار شخصي لا يعمم.. ولكن اللي بنحذر منه هو الأختلاف الواضح والصريح زي أنه مش بيصلي مش بيصوم بيقول ربنا مش موجود وهكذا.

٤- مدمن حالي رافض العلاج (أياً كان نوع الأدمان) / مرض نفسي رافض علاجة.. ودي وبلا أطاله نهايتها أما تتشد معاه فى أدمانه أو أما هتتقلب مريض نفسي فى نهاية الأمر بداله!

٥- مشاكل سابقة فى العلاقة السابقة ولسه منتهتش ومتعالجتش صح ودي مصيبة حقيقية لأن العلاقة الجديدة هنا لم تبدء كعلاقة جديدة ولكنها بدءت من كيف انتهت العلاقة السابقة فلو لسه المشاكل دي حتي موجوده عند الشخص فى ال Background .. يبقي من الأمانة والمصداقية ميدخلش علاقة يظلم بيها معاه شريك حياته قبل ما يحل المشاكل السابقة دي.. ودي بيسموها فى العلاقات Unfinished business with ur ex.

طبعاً فيه علامات كتير بتقولك متكملش.. وهنا بنقول تاني.. أحنا بنتكلم عن أدله وليس تخمين أو ظن أو شك.

طيب لو لقيت دول أعمل أية بقي؟

تعمل الأتي:

STOP

THINK

ACT

أقف كدا يابن أو يا بنت الناس وقيموا علاقاتكم وشوف نهايتها أية.

مدمن/ مريض نفسي مش عايز يتعالج فده هياخدك من ايدك ويوديك لفين؟

خاين بخيانات متكرره بأدله شكل حياتكم واستقراركم النفسي أية؟

حد بيقولك ربنا مش موجود أو أنا مسلم أو مسيحي بس مش بصلي لا بصوم نهائياً.. حاول تشوف كدا على فين أنت رايح فى علاقاتكم وأولادكم.

حد صبح وليل خناق وزعيق وعكننه وغم ولوم وانتقاد... شوف شكل حياتكم كدا رايحه فين وخاصة لما يزيد بينكم ال Day to day activities فيدخل بقي مصاريف بيت وأولاد ومسائل عائلية ومشاكل و و و. (دي أخطر علامة بلا منازع بتقولك متكملش)

أو حد معاك فى علاقة بس مش عارف يكون فيها Here and now .. هو حرفياً مش معاكي.. هو بيشوفها فيكي، منتظرك تكوني هيا، روحها مش روحك، ضحكتها دلعها كلامها هزارها كل حاجه.. هو عايزها(هيا) فى صورة (أنتي) .. أما بقي لو خلاف سابق منتهاش فدي المصيبة الأكبر لأنه فى الجزئية دي الكتاب بيقول نصاً

Those issues have a way of coming back, unfortunately, even stronger!

يعني المشاكل اللي منتهتش فى علاقة سابقة وارد جدا جدا أنه غالباً تتحاسب عليها بنت الناس اللي ملهاش أي ذنب دي أو ابن الناس اللي بيتحاسب على ذنب مش بتاعة.

بس يا سيدي.. دول كانوا ٥ علامات من أصل علامات كتير أوي بتقولك خلي بالك.. ولو دول موجودين.. يكون ليك واقفه مع نفسك.. وأياك أياك تلعب فيهم دور المنقذ علشان انت غالباً اللي هتغرق ووقتها مش هتلاقي حد ينقذك!

Post Original Date:  March 21, 2021
FB Post's Link: https://www.facebook.com/daghash.eslam/posts/10219624966515160 Photo Source: https://pixabay.com/