موقف محير!

 س: بحب مديرتي فى الشغل هيا أصغر مني ب5 سنين بس بدءت مجالها بدري أوي وتعليمها برا مصر خلاها اول منصب ليها كان إداري مباشرة مش زينا بدئنا السلم الوظيفي من بدايتة. عايز أخد خطوة ومش عارف أعمل أية ومتردد اخد خطوة واللا لأ؟

ج: الحقيقة حضرتك فى موقف من أصعب المواقف اللي بتقابلنا وقت الأرتباط... والموقف ده بالذات يحتاج لكثير من الحكمة قليل من العاطفة ومزيداً من الصبر والتفكير والتعقل قبل أي خطوة.. اللي مصعب الموقف كام حاجة حابب أشاركهم مع حضرتك لربما كانوا Eye Opener ليك فى وضعك الحالي:

1- فى مثل هذه مواقف بنحتاج أن الشخص يقف وقفة صدق مع نفسه ويسألها سؤال يعيده ويكرره على نفسه ألف مرة قبل ما ياخد أي خطوة وهو:

أنا معجب بيها؟ واللا بال Profile بتاعها؟

لا أخفيك سراً يا صديق أن الحته دي بالذات واحدة من الضريبة اللي بيدفعها الأشخاص الHigh Profile (شباب وبنات) وقت الأرتباط أن كتير منهم بيقف عند سؤال (وخاصةً لو كانت بنت) هو/هي عايزني علشاني واللا علشان الProfile بتاعي؟

تأكدت خلاص من الخطوة الأولي.. ولقيت نفسك لأ.. أنا معجب بيها هيا وبشخصيتها.. يعني مش هيفرق حتي لو سابت الشغل بكرا وقررت متشتغلش تاني أو أو.. يبقى تنتقل للخطوة رقم 2:

2- تفكر فى ال3 أسئلة دول:

السؤال الأول: ماذا لو رفضت؟ طبيعة رفضها هيكون عامل ازاي؟ وهل ده هيأثر على علاقتكم فى البيزنس؟

وبرضوا لا أخفيك سراً يا صديق أننا فى مصر معظمنا فى بيوتنا ومدارسنا متعلمناش نعمل أية لما نختلف مع بعض لدرجة أني ممكن أقابل واحدة تسيب الشغل علشان فسخت الخطوبة مع خطيبها!!!!!! او يكون مديرها ويبدء يزودلها فى التاسكات بتاعتها او ينقلها إدارة تانية أسوء من اللي هيا فيها.. وهنا بقف أتعجب! ما لكم كيف تحكمون! يعني امبارح كان صديق واليوم من أجل مجرد خلاف بقي عدو!!!

السؤال الثاني: ماذا برضوا لو دخلتم فى فترة تعارف ثم أي حد فى حضراتكم أكتشف أنكم متنفعوش لبعض؟ وده شيء وارد جداً... أوقات ممكن تقابل أفضل 2 فى الوجود.. بس مش أفضل 2 لبعض... شاطرين أوي كزملاء... شاطرين أوي كأصدقاء.. بس عمرهم ما هيتقابلوا على خط واحد كرفقاء درب وشركاء.

السؤال الثالث: لو أراد الله وكملت علاقتكم على خير.. هل ممكن نجاحها فى الكارير بتاعها وتفوقها يسبب ليك أي أذي نفسي أو أو؟ او السؤال بشكل أخر.. يا تري هتقدر تشدها لفوق أكتر؟ هتقدر تبني أكتر؟ وهتفضل تبني أكتر؟ يعني مثلاً لو عايزة تدرس شهادة معينة ولغة معينة ثم تشتغل فى شركة دولية قبضها 5 أضعاف قبضك هتساعدها فى ده؟ لو بنسبة 1% مش هتقدر تساعد وتكبر وتبني.. نصيحة لوجة الله... بلاش.

3- حسبت حسبتك كاملة فى كل اللي قلناه فوق ده؟ يبقى حان وقت أنك تاخد خطوة؟

وقبل ما أقولك رأيي.. الحقيقة أن الأمانة العلمية تخليني أأكد عليك أن الكلمتين الجايين دول ليسوا رأي علمي ولكنهم رأي شخصي مبني على تجارب كتير مشابهه من على أرض الواقع شفتها فى الجلسات.

دور على حد حكيم سواءً كان رجل أو ست.. أطلب مساعدتة بأنة يفتح الموضوع معاها.. مجرد يفهم هيا مرتبطة أو لأ؟ ويشوف رأيها فى الفكرة بدون ذكر أسمك لو هيا Open للفكرة يبقى يجمعكم مع بعض.

حصل ومشيت الخطوة دي؟

يبقى فترة تعارف.. يليها فترة قراية فاتحة وشبكة.. يليها فترة خطوبة.. وكل فترة طبعاً بننتقل للتاليه لو الدنيا ماشية كويس وبتبشر بنجاح العلاقة.

ومن فضلك.. أرجع تاني أقرأ رقم ١ لأنها أهم ما كُتب فى الرد.

نصيحة أخيرة... متتعشمش أوي.. ومترفعش سقف توقعاتك.. ومتبنيش خطط ولا تصورات ولا أحلام.. سيب المستخبي من القدر يبان خطوة بخطوة.. وربنا معاك

Post Original Date:  Nov. 2, 2020
FB Post's Link: https://www.facebook.com/daghash.eslam/posts/10218634000781636 Photo Source: https://pixabay.com/