الثقة.. الكلمة الأهم فى العلاقات.. تقدر تشبهها بحبل.. حبل طويل.. ليه طرفين.. طرف معاك والناحية التانية مع الأخر.
لما يفضل الأخر متمسك بحبل الثقة ده.. وبيحاول يوصلك ثقتة فيك ويعمل ده قولاً وفعلاً ويقولهولك ويأكد عليك ده مره وأتنين وتلاتة... ويسيبلك الحبل لدرجة أنت نفسك تستغربها هو ازاي بيثق فيا للدرجة دي.. قدامك خيار من أتنين هنا:
- أما تلف الحبل على إيدك أكتر.. وتطلب منه يلف الحبل على إيده أكتر وتقوله أن اللي فات ميهمنيش منه غير أننا نكون خرجنا بدروس مستفادة مع تعهد بعدم تكرارها ويالا بينا نبدء صفحة جديدة وتعاهد نفسك وتعاهده أن اللي فات مش هيتكرر تاني وتطلب منه بعدها يلف الحبل ده على إيده وتتعهد أنت وهو أن أي طرف هيقع أو هيحصل مشكلة هيلاقي التاني بيشد الحبل ده وبيقومه بيه ويدعمه بما أستطاع.
أو
- أنك تاخد الحبل ده بعد الثقة دي كلها اللي حاول معاك فيها مرة وأتنين وتلاتة وتلف الحبل حوالين رقبتك ورقبته لحد ما تخنق نفسك وتخنقه وتموت بإيدك كل حاجة حلوة كانت بينكم!
أوعي توصل للطرف الأخر أن كل محاولاته معاك باءت بالفشل.. وتخليه يندم على كل دقيقة أستثمرها فيك وكل مشاعر كانت جواه تجاهك لأن المؤسف أن لما بيوصل الأمر من درجة تصدع فى الثقة بينكم لدرجة إنهيار الثقة بينكم غالباً هياخد خطوة لورا.. ومش بس هيشكك فى علاقتكم ومشاعره تجاهك.. هو غالباً هيوصل لدرجة أصعب وهي التشكيك فى كلمة LOVE نفسها!
الأختيارين أهم فوق قدامك.. أختار أي قرار فيهم يناسبك... والقرار قرارك!
وأه.. بالمناسبة... حتى الثقة لو أتهدت برضوا لو لسه حابب ترجعها كما كانت فده فى إيدك.. بس هتحتاج حاجتين.. أثبات حقيقي لده قولاً وفعلاً بالابتعاد الحقيقي عن كل حاجة هدت الثقة بينكم وأدت لتدهور الوضع بالشكل ده وعامل الوقت!
وبرضوا القرار قرارك!
Post Original Date: June 28, 2020
FB Post's Link: https://www.facebook.com/daghash.eslam/posts/10217663507999923
Photo Source: https://pixabay.com/
No comments:
Post a Comment