عليكم بأنفسكم..!

 قالت: "انا اكتشفت ان مشكلتي الأولي اني إنسان كنود.. والإنسان الكنود ده مبيبقاش فيه خير لنفسه ولا للناس لانه كنود مع الافضل منهم"

- لو حضرتك تسمحيلي أستفسر عن المقصود بكنود؟

قالت: "الإنسان الكنود ده هو اللي بيعد المصائب وميعرفش يذكر غيرها، ويفكر الناس بيها، وينسي نعم الله عليه.. عارف حضرتك عقلية الحل اللي بتتكلم عنها؟ أنا عقلية المشكلة أو الأزمة أو بصراحة أكتر أنا عقلية جملة ممكن تلخص مشكلتي وهي "انا كاره للبشر ولا اري أي خير فيهم" .. أنا من كتر بحثي عن السلبي لو شفت واحدة بتتكلم حلو عن جوزها بقولها يارب بس ميكنش فى الاول كدا.. ولو قالتلي أحنا بقالنا كتير متجوزين هقولها يبقي مدورتيش وراه كويس ولو قالتلي دورت كويس هقولها يبقي كدا شكك لازم يزيد تجاهه لأن كدا يبقي بيخفي اى آثار وراه.. ولو شفت واحد بيتكلم حلو على مديره هقوله تلاقيه مشغلك عبد وأنت سامح ليه يمارس ساديته عليك.. أنا بقيت بفترض الشر فى كل الناس اللي بقابلهم وغالباً بيطلع شكي فى محله.. مبتكلمش مع الناس إلا للضرورة القصوي ومعتزله عنهم خوفاً من شرهم.. انا فعلاً بكره الناس بس ببين للبنات اللي حواليا العكس"

- الوصف اللي حضرتك بتوصفيه ده يا فندم كان موجود طول العمر واللا تواجد بعد موقف/ حدث/ توقيت معين؟

قالت: "ده بعد ما عاشرت شله معينه عشت معاهم ٥ سنين من عمري.. شله مبنعملش حاجه كل يوم غير قاعدين نتريق على الناس ونجيب فى سيرة الناس ونضحك على ده ونقلس على دي ونتنمر على دول والموضوع تطور نعمل فى الناس مقالب ونوقع الناس ف مشاكل وفبعض ونقعد نضحك......"

ده كان جزء بسيط من محادثة أكدتلي أني بكون محق لما أقول:

- الصاحب ساحب.. لو بعد كلامك مع صاحبك لقيت علاقتك بتتغير مع شريك حياة أو اب أو أم للأسوء من فضلك متكملش.

- لو لقيت صاحبك ساحبك لأنك تكره العلاقات والناس متكملش.

- لو لقيت صاحبك بيقولك أن الحياة بدون بشر احلي وأنه مفيش خير فى الناس وبدء يوريلك أسوء ما فى خلق الله وبيزود شكك تجاه الجنس الأخر لو سمحت أوقف محادثتكم فوراً..

الحالات دي بقت بتزيد يوم عن التاني..

كره العلاقات بقت بتزيد يوم عن التاني...

الخوف من الجنس الأخر بقي بيزيد يوم عن التاني..

توقع الأسوء من الجنس الأخر بقي محرك اولي بيزيد يوم عن التاني.

من فضلكم.. عليكم بأنفسكم..

أنا بحب الناس وبحمد ربي على دي نعمة ومهماً اتأذيت منهم أي حالة فردية لا تعني الجمع ووسمها على البشر ككل.

الجملة الأخيرة دي.. وربي كنت بقولها لنفسي النهاردة..

حبوا الناس يا جماعة لأن الناس حقيقي كلها خير وتتحب

Post Original Date:  Nov. 5, 2020
FB Post's Link: https://www.facebook.com/daghash.eslam/posts/10218649525929755 Photo Source: https://pixabay.com/