It's All About Me!

 أعتقد أنه من باب الأمانة أننا زي ما بنعلم الناس وبندربهم على قانون It's all about me.. فكذلك من باب الرحمه أننا نعرفهم أنه فى التواصل مش شرط أن كل المشاكل تبقي أنت السبب فيها!

التواصل ليس بالعمليه السهله السلسه. ده لأنه بيحكمه حاجات كتير جداً زي التربية والتنشأة، الخبرة الحياتية، مستوي الوعي بالذات وبالآخر، المستوي العلمي، المستوي الثقافي، العلاقات السابقة (ودي قصة كبيرة لوحدها)، البيئة المحيطه، والأهم من كل دول.. نظرتنا عن نفسنا وعن الأخر والأخرين.

وبناءً عليه أتمني منك تقبل الأتي:

* أنه ممكن حضرتك تقول كلمة نصح صادقة لحد فيترجمها هو أنها نقض أو أنك بتتكبر عليه وبتعمل فيها أستاذ عليه. وقتها قدمت النصح مره والتانيه ومتسمعش خد بعضك وأمشي.. وأنت ماشي أفتكر "لست عليهم بمسيطر" .. أحنا لا عمرنا كنا بنعرف نغير حد مش عايز.. ولا حتي قيام الساعه هنكون عرفنا ازاي نغير بني ادم مش عايز يتغير.. ده سيدنا نوح، إبراهيم، لوط، محمد اللي كانوا معاهم الدعم السماوي مقدروش يغيروا اقرب الناس ليهم.. هتعرف أنت؟

* أنك متتحبش من شخص أو مجموعه علشان أنت من طرف فلان اللي هو أو هما مبيحبهوش.

* أن صحبتك تكره زميلكم محمود بدون سبب.. تكره صوته وشكله وأسلوبه وكل حاجه فيه.. تتسأل صبح وليل عن السبب متقولش.. فتلاقي أن الشخص ده بيفكرها بفلان.. أياً كان فلان ده مين.. خطيبها اللي سبها قبل ميعاد خطوبتها بيوم.. مديرها اللي أكل عليها حقها فى الشغل.. أستاذها اللي سقطها فى أمتحان الOral فى كام ماده علشان المنافس ليها يبقي أبن أستاذ زميله ومحجوز ليه منصب معيد.. أو أو.

* أن حد يكون ماشي يحكم على خلق الله.. ماشي يقيم فى الناس ويصنف فيهم وعينه مبتشوفش غير أخطائهم.. فتلاقي مرضه ده أصابك!!! فعادي تلاقيه كرهك، قرر ميتعاملش معاك، بل ويمشي ينصح الأخرين بعدم التعامل معاك.

فى مره من سنين طويلة كنت باخد Feedback عن أداء أستاذي (كجزء من شغلي) فلقيت شاب صغير فى كليه ضمن الحضور كاتب كلام سيء جداً!! فأحتراماً وتقديراً ليه كلمته فى التليفون وده كان جزء من رده " المحاضرة كانت كويسة.. بس المحاضر حاجه صعبه أوي طول المحاضرة حاطط إيده فى جيبه ودي فى لغه الجسد معناها انه معووج (وفضل يقول شوية كلام سلبي عن أستاذي اللي اشتغل مع اكثر من ٣٠ جنسية ومعظم تقيماته كانت Excellent / Outstanding) .. تلاقي نفس الطالب طالب زميله درسله فى ساعه فى الCivil Work لغة جسد وقعد يقولهم خلوا بالكوا لو لقيتوا فلان بيعمل كدا فى ده فى لغة الجسد أحظروا منه، لأن دي معناها كذا وكذا.. وطبعاً كان ضمن ده لو حاطط إيده فى جيبه يبقي معووج!

خلاصة القول.. التواصل شيء ليس بالهين.. التواصل شيء لا يستطيع أنسان على وجه الأرض يفضل يجيب فيه أجوان على طول الطريق.. ولا يوجد بشري قادر على أنه يفضل طول الوقت 100% Effective Communicator

أقولك سر؟

أنا أصعب أنواع ال Coaching Session عندي هيا الCommunication Session وأصعبهم بلا منازع عندي هيا ال Family Communication وخاصة لو كانت المشكلة بين أب وأم بيتفننوا أزاي يأذوا بعض والضريبة بيدفعها ناس تانيين.. أبنائهم!

الخلاصة.. بعد ما تعمل اللي عليك.. وبعد ما تطبق قانون It's all about me وتاخد بالأسباب اللي توصل رسالتك بشكلها الصحيح.. وقت ما تلاقي خطأ ما.. تكتبه.. علشان تعالجه أن أمكن.. مش علشان تقعد تجلد نفسك طول الوقت عليه!!!

Post Original Date:  July 23, 2019 FB Post's Link: https://www.facebook.com/daghash.eslam/posts/10214877587193644 Photo Source: https://pixabay.com/